முதுமொழி என்பது பழமொழி என்னும் சொற்பொருளோடு தொடர்புடையது. காஞ்சி என்பது மகளிர் இடையில் அணியும் ஒருவகை அணிகலக் கோவையையும் குறிக்கும். பல மணிகள் கோத்த காஞ்சி அணி போல முதுமொழிகள் பல கோத்த நூல் முதுமொழிக் காஞ்சி எனப் பெயர் பெற்றது எனச் சிலர் கூறுவர்.

     இந் நூலை இயற்றியவர் மதுரைக் கூடலூர் கிழார். கூடலூர் இவர் பிறந்த ஊராயும், மதுரை பின்பு புகுந்து வாழ்ந்த ஊராயும் இருத்தல் கூடும். கிழார் என்னும் குறிப்பினால் இவரை வேளாண் மரபினர் என்று கொள்ளலாம். சங்க நூல்களில் குறிக்கப்பெறும் கூடலூர் கிழாரும் இவரும் ஒருவர் அல்லர். சங்கப் புலவர் 'புலத்துறை முற்றிய கூடலூர் கிழார்' என்று குறிக்கப் பெறுகிறார். இவ் இருவரையும் குறிக்கும் அடைமொழி வேறுபாடே இருவரும் வேறு வேறு புலவர் என்பதைப் புலப்படுத்தும். மேலும், முதுமொழிக் காஞ்சியில் வரும் விழைச்சு, சொன்மலை, மீப்பு முதலிய பிற்காலச் சொல்லாட்சிகளும் இவர் சங்கப் புலவர் காலத்திற்குப் பிற்பட்டவர் என்பதைத் தெளிவுபடுத்தும்.

     இந் நூலுள் பத்துப் பத்துக்களும், ஒவ்வொரு பத்திலும் பத்து முதுமொழிகளும் உள்ளன. ஒவ்வொரு செய்யுளின் முதல் அடியும், 'ஆர்கலி உலகத்து மக்கட்கு எல்லாம்' என்றே தொடங்குகின்றமையால் இந் நூல் நூறு குறள் வெண் செந்துறையாலானது எனலாம். எல்லா அடிகளிலும் பயின்று வரும் சொற் குறிப்பைக் கொண்டு, ஒவ்வொன்றும் சிறந்த பத்து, அறிவுப் பத்து என்று பெயர் பெற்றுள்ளது.

     நூறதாம் சிறுபஞ்ச மூலம்; நூறு
     சேர் முதுமொழிக் காஞ்சி.

எனவரும் பிரபந்த தீபிகைக் குறிப்பினால் முதுமொழிக்காஞ்சி நூறு எண்ணிக்கை உடையதாகக் கருதப் பெறுதலும் விளங்கும்.





     ஓசையினை உடைய கடல் சூழ்ந்த உலகத்தில் உள்ளவர்கள் எல்லாம் ஒழுக்கத்துடன் இருப்பது சிறந்ததாகும்.



     பிறர் அன்பு பாராட்டும்படி நடத்தலை விட அவர் மதிக்கும்படி நடத்தல் மேலானது.



     புதிதாக ஒன்றை அறிந்துகொள்வதை விட கற்றதை நினைவில் வைத்திருப்பது மேலானது.



     செல்வத்தினும் சிறப்புடையது உண்மை வாழ்க்கையாகும்.



     நோயில்லாமல் இருத்தல் இளமையினும் சிறப்பானது.



     அழகைக் காட்டிலும் வெட்கம் சிறப்பானது.



     உயர்ந்த குலத்தைக் காட்டிலும் கல்வி மேன்மையானது.



     கற்றலை விடக் கற்றாரை வழிபட்டொழுகுதல் மேலானது.



     பகைவரை வெல்லுவதைவிட தன்னை மேம்படுத்திக் கொள்வது சிறப்பானது.



     செல்வம் பெருகி அழிவதைவிட, பெருகாமல் நிலையாக இருத்தல் நன்று.





     கடல் சூழ்ந்த உலகத்தில் உள்ள மக்களுக்கெல்லாம் ஒருவன் உயர்ந்த குடியில் பிறந்தாலும் அவன் அருளால் அறியப்படுவான்.



     இரக்கம் உள்ளவன் என்பது அவன் கொடுப்பதனால் தெரியும்.



     உதவி செய்யும் தன்மையினால் நல்ல நண்பர்களைப் பெறுவான்.



     ஒருவன் பெற்ற கல்வியை அவனின் அறிவால் அறிவார்கள்.



     ஒருவன் செய்யும் செயல்களால் அவனின் ஆராய்ச்சி அறிவு அறியப்படும்.



     தாழ்குலத்திற் பிறந்தமையைச் செருக்கினால் அறிந்து கொள்வர்.



     வஞ்சகச் செயலும் எண்ணமும் ஒருவனைத் திருடனாக்கும்.



     சொல் தளர்ச்சி எல்லாத் தளர்ச்சியையும் காட்டிவிடும்.



     ஒருவன் அறிவுச் சோர்வுடையதாக இருந்தால் அவன் எல்லாச் சோர்வுகளையும் உடையவனாவான்.



     முயற்சியின் திறம், முடிக்கும் செயலால் அறியப்படும்.





     கடல் சூழ்ந்த உலகத்து மக்களெல்லாருக்குள்ளும், ஒரு செய்கையிலும் நிலை இல்லாத இயற்கை குணத்தை அறிஞர் பழிக்கமாட்டார்.



     மேன்மைக்குணம் இல்லாதவருக்கு மேன்மை செய்யாவிட்டால் யாரும் பழிக்கமாட்டார்கள்.



     பெருமை தரத்தக்க செயலை முடிக்கும் தன்மையை யாரும் பழிக்கமாட்டார்கள்.



     அருமையான பொருளின் பெருமையை யாரும் பழிக்கமாட்டார்கள்.



     ஒரு வேலை முடியாதபோது அதனைக் குறித்துப் பழிக்கமாட்டார்கள்.



     தர்மம் இல்லாத அரசனிடத்து இருக்கும் அறிஞர்கள் அவனது நாட்டைப் பழிக்கமாட்டார்கள்.



     உதவி செய்யவல்ல நல் இயல்புடைய சுற்றத்தார் அதனைச் செய்யவில்லை என்றால் பழிக்க மாட்டார்கள்.



     தெரியாத தேசத்திற்குச் செல்லும்போது அங்குள்ள ஒழுக்கத்தைப் பழிக்கமாட்டார்கள்.



     வறுமையுடையவனின் ஈயாமையை யாரும் பழிக்கமாட்டார்கள்.



     சிறுமைக் குணம் உடையவரின் ஒழுக்கத்தை யாரும் பழிக்கமாட்டார்கள்.





     பழியுடையாருக்குச் செல்வம் இருந்தாலும் இல்லாததைப் போன்றதாகும்.



     அஞ்ச வேண்டியதற்கு அஞ்சாமல் இருத்தல் பேடித்தன்மையாகும்.



     வெட்கத்தை விட்டுப் பசி நீங்கினாலும் அது பசி நீங்காததைப் போன்றதாகும்.



     விருப்பமில்லாமல் கொடுத்தால் அது கொடைத்தன்மை ஆகாது.



     செய்ய இயலாதவற்றை நான் செய்வேன் என்பது பேதைமையாகும்.



     பொய்யாகச் செய்யும் உதவி கீழ்மைத் தன்மையாகும்.



     பழைய நண்பனுக்கு உதவி செய்யாமல் இருத்தல் கொடுமையானதாகும்.



     அறிவில்லாதவனோடு துணைக் கொள்ளுதல் தனித்திருத்தலை ஒக்கும்.



     கிழத்தனமும் சினமும் ஒன்று.



     பிறருக்கு உதவாமல் தானே இன்பம் அடைந்து கொள்வான்; அவன் செல்வந்தனாயினும் வறியவனே.





     கணவன் குறிப்பறிந்து ஒழுகாதவள் உண்மை மனைவியாகாள்.



     மனை மாட்சிமை இல்லாத இல்லறம் நல்லறமாகாது.



     அன்பில்லாத தொடர்பு உறவுமாகாது நட்புமாகாது.



     யாருக்கும் ஈயாதவனுக்குப் புகழில்லை.



     மன ஒற்றுமை இல்லாதவன் நண்பனில்லை.



     கற்பிக்கும் ஆசிரியனுக்கு உதவாமற் கற்கும் கல்வி கல்வியாகாது.



     தான் வாழாமல் பிறர் வாழ்வதற்காக வருந்தியது வருத்தமன்று.



     நல்ல வழியில் வராத செல்வத்தைக் கொடுப்பது தர்மமாகாது.



     தனது தகுதிக்கேற்ற தவம்புரியாமை தவமன்று.



     மறுமைக்குரிய அறவொழுக்கங்களை ஒழுகாமலே அடைந்த மூப்புச் சிறப்பாகாது.





     எல்லாச் செல்வங்களைவிட மக்கட் செல்வமே சிறந்த செல்வம்.



     கடமைகளைச் செய்வதைவிட வேறு செயல்கள் நமக்கில்லை.



     மக்கட்பேறு வாய்த்தலான கலவியே சிறந்த கலவியாம்.



     மக்கட்பேறு இல்லாத கலவி தீய கலவியாம்.



     கொடுக்கக்கூடியதை மறைத்து வைத்தல் பெரிய கொடுமையாகும்.



     உணர்வில்லாதவன் பிணத்துக்கு ஒப்பாவான்.



     ஆசையே ஒருவனுக்கு வறுமையாகும்.



     புகழே இவ்வுலகத்தில் சேர்த்து வைக்கும் செல்வமாகும்.



     ஒருவனுக்கு இரத்தலை விட வேறு இகழ்ச்சி இல்லை.



     ஈதலினால் வரும் சிறப்பைவிட வேறு சிறப்பில்லை.





     அறிவு இல்லாதவன் இனிமையாக வாழ்வது அரிது. (நல்ல அறிவுடையவன் இன்பமாய் வாழ்வான்.)



     மிக்க செல்வமுள்ளவன் கோபப்படாமல் இருத்தல் அரிது.



     கள் உண்போன் சோர்வு இல்லாமல் இருப்பது அரிது. (கள் உண்பவன் ஒழுக்கத்துடன் இருக்க மாட்டான்.)



     காலம் அறியாது செய்யும் செயல் வெற்றி பெறுதல் அரிது. (காலமறிந்து செய்யும் செயல் வெற்றியடையும்.)



     வருவதை அறியாதவன் தற்காப்புடன் வாழ்வது அரிது. (எதிர்காலத்தில் வருவதை அறிபவன் தற்காப்பு உடையவன் ஆவான்.)



     சிறந்த செயல்களைச் செய்யாமல் சோம்பலுடன் இருப்பவனுக்குச் சிறப்பில்லை.



     அடக்கமில்லாமல் இருப்பவர் பெருமையுடன் வாழ்வது அரிது. (பெருமை வேண்டுபவன் அடக்கத்துடன் இருக்க வேண்டும்.)



     பெருமைச் செருக்கில்லாதவன் இழிந்த இயல்புகளை அடைய மாட்டான்.



     பொருட்பற்றுடையவன் நடுவு நிலைமையில் இருக்க இயலாது.



     உள்ளத்தில் தூய்மை இல்லாதவன் தவஞ்செய்தல் இயலாது.





     புகழ்மிக்க அறச்செயல்களைச் செய்தவர்கள் சொர்க்கத்திற்குப் போவார்கள்.



     கலகத்தின் மேல் விருப்ப உடையவர்களுக்கு சண்டை உண்டாதல் எளிது.



     இரக்கம் உடையவன் கேட்டவுடன் பொருள் தருவான்.



     கோட் சொல்பவர்கள் அதர்மத்தை வெளிப்படுத்துவார்கள்.



     செயலில் உள்ள துன்பத்தைத் தாங்குபவர்களுக்கு இன்பம் உண்டாகும்.



     இன்பத்தை விரும்பி முயல்பவர்கள் துன்பத்தைச் சந்திக்க நேரிடும்.



     உணவினை மிகுதியாக விரும்புபவர்களுக்கு நோய் உண்டாகும்.



     பெண்களை விரும்புவர்களுக்குப் பழி அதிகமாக வரும்.



     பிறர் கவலையைத் தாங்குபவர்களுக்குப் பகுத்துண்டல் எளிது.



     கெட்டவர்களோடு சேர்ந்தவர்கள் கொலையும் செய்வர்.





     முறை செய்யாத அரசனுடைய நாடு எந்நாளும் வறுமையுடையதாகும்.



     இளமை கடந்தவனின் காமத்தை நுகர்வது துன்பத்தைத் தரும்.



     உள்ளத்தில் பகை கொண்டவனைச் சேர்ந்து வாழ்தல் துன்பத்தைத் தரும்.



     நோயுடையவன் பெற்ற இன்பம் துன்பத்தைத் தரும்.



     அன்பில்லாதவரிடம் பழகுதல் துன்பத்தைத் தரும்.



     முதுமையுடையவன் அணியும் அணிகலன் துன்பத்தைத் தரும்.



     சொல்லை மதிக்காதவரிடத்து சொல்லுதல் துன்பத்தைத் தரும்.



     நல்ல எண்ணம் இல்லாதவரிடத்துச் சேர்தல் துன்பத்தைத் தரும்.



     மதிக்காதவரிடத்து சினம் கொள்ளுதல் துன்பத்தைத் தரும்.



     நட்பு இல்லாதவரிடத்து உதவிக்குச் செல்லுதல் துன்பத்தைத் தரும்.





     உயர விரும்புபவன் பிறரை உயர்த்திப் பேச வேண்டும்.



     செல்வத்தை விரும்புபவன் புகழுக்குரிய செயல்களைச் செய்ய வேண்டும்.



     கல்வி வேண்டுபவன் ஆசிரியரை வழிபட வேண்டும்.



     முக்தி வேண்டுபவன் தவம் செய்ய வேண்டும்.



     செல்வாக்கு வேண்டுபவன் தன் செயலை ஆராய வேண்டும்.



     செல்வம் வேண்டுபவன் இடைவிடாது முயற்சி செய்ய வேண்டும்.



     இன்பம் வேண்டுபவன் முயற்சியில் உள்ள துன்பங்களைப் பொருட்படுத்தக் கூடாது.



     சிற்றின்பத்தில் மூழ்குபவன் துன்பமடைவான்.



     குடிமக்களின் இன்பத்தை விரும்பும் அரசன் முறையோடு அரசாட்சி செய்ய வேண்டும்.



     காமத்தை விரும்புபவன் குறிப்பறிதலில் வல்லவனாயிருத்தல் வேண்டும்.

---

---