ஞாலத் தருணை நலிவகற்று நாயகற்குச்
சீலத் தருணை சிலேடை வெண்பா - மாலைசொல
யானை திறை கொண்ட தெனாதிதயக் கார்வரையில்
யானை திறை கொண்ட விபம்.

மாகவிஞர் நூன்முகத்தில் வைணீகர் யாழிசையில்
ஆக ரிவரும் அருணையே - நாகர்
மெயிலாய வெற்பினான் மேம்படுதார் வேய்ந்த
கயிலாய வெற்பினான் காப்பு . 1
முப்பொருளிற் றாபதரு மொய்தெருவிற் கந்துகமும்
அப்பிரிய முந்தும் அருணையே - யொப்பரிய
மாதார கத்தன் வயன்றுதித் தாரகத்தன்
கேதார கத்தன் கிரி. 2

சீரங் கனையார் திருக்குஞ் சுரிகுழலும்
ஆரம் பரிக்கும் அருணையே- யீரிரண்
டாரண வாசிய னங்கண வாசியன்
வாரண வாசியன் வாழ்வு . 3

நித்த விரதர் நியதியும் மாதவமும்
அத்த மனத்தாம் அருணையே - பத்தரது
மாச யிலத்தன் மனமாந் தனியிலத்தன்
சீச யிலத்தன் சிலம்பு . 4

தேறு கலைப் பயில்வுந் தேங்குமுயிர் நீங்குநரும்
ஆறுதலை யாக்கும் அருணையே - மாறனடித்
தேக ரணத்தான் செலாத கரணத்தான்
கோக ரணத்தான் குடி . 5

தீத்தொழிலி னின்று சிவாகமமுங் கான்யாறும்
ஆத்தி கரைத்தீர்க்கும் அருணையே - மூத்தமக
னாங்கானை மாடத்தா னாகட்பெற் றூர்ந்தபெம்மான்
றூங்கானை மாடத்தான் றோய்வு . 6

மேதகுகல் லூரிகளின் மெய்யுணர்ந்தார் பொய்யுடம்பில்
ஆதரங் கூரா அருணையே - மோதகழி
நீடலை யாற்றிருந்தார் நில்லாமே யோட்டேடுக்குங்
கூடலை யாற்றிருந்தார் குன்று. 7

மேவாப் பெய் யென்றஞ்சி வேந்துமுரு விற்சுரரும்
ஆவா கணிமே வருணையே - யேவாய்
நதிணகத் தலத்தா னகுகைத் தலத்தா
னதிகைத் தலத்தான னகம். 8

வேக வமர்க்களமு மேலோ ரவைக்களமும்
ஆகமங்க ணாடும் அருணையே - யாக
கருத்தா சலமுற்றான் காதலன்பர் தம்பால்
விருத்தா சலமுற்றான் வீடு . 9

ஒற்றரொன்னா ரூரி லொருவெள்ளம் யூபத்தில்
அற்ற மறியும் அருணையே- தெற்றலுற்ற
வேணி குழியான் வியோ மகங்கை பாய்ந்துமன்று
மாணி குழியான் மனை . 10

காமருப டப்பைகளிற் கார்குலங்கள் சீர்க்கிடங்கில்
ஆமலக மாரும் அருணையே - சாமத்தை
மெச்சியே கம்பத்தான் மேலொழித்த கம்பத்தான்
கச்சியே கம்பத்தான் காப்பு . 11
சாற்றுமட வார்வயிறுஞ் சார்ந்தவரைத் தேர்ந்தவரும்
ஆற்றுப் படுக்கும் அருணையே - கூற்று
வருமேற் றளியார் வதைப்பரவ ராய
திருமேற் றளியார் சிலம்பு. 12

உத்தமகு லச்சேயு மொண்குமுதப் பூந்தடமும்
அத்துவரி நேரும் அருணையே - பத்தர்
சினேகதங் காவதத்தார் தேவனென்பார்க் காக்கு
மனேகதங் காவதத்தா ரார்பு. 13

மாதரெழிற் செய்குன்றும் வாயிலின் கண்வேரமுஞ்செய்
யாதவரை யேய்க்கும் அருணையே - யேதங்
குறிக்காரைக் காட்டான் கொடுங் காலனுக்கு
நெறிக்காரைக் காட்டா னிலம் . 14

முத்தருள நிந்தனைக்கு மொய்குழலார் நீள்விழிக்கும்
அத்தியந்த மாறும் அருணையே - சத்தி
கரங்கணின்முட் டத்தான் கருளுலகுக் காக்குங்
குரங்கணின்முட் டத்தான் குடி. 15

மங்குலொலி யாலளையின் மண்புரப்பார் திண்புயத்தில்
அங்கதம லங்கும் அருணையே - கங்குலிற்றீஞ்
சொற்கோல மாதேவன் றொண்டனை முயங்குகென்ற
விற்கோல மாதேவன் வீடு . 16

பற்கல் வரநதியும் பண்பிகவாச் சாற்றோரும்
அற்பரவைக் கோடும் அருணையே - பொற்பக்
கருவாலங் காட்டினான் கண்டமட்டுந் துய்த்துத்
திருவாலங் காட்டினான் சேர்பு. 17

கொம்பனையார் நம்புகற்பில் கோயிலின்றி வீற்றிடத்தில்
அம்ப லமலா அருணையே -யும்பருய்ய
உண்பாக்க மைந்தனுசி தநஞ்சு முண்டமைந்தன்
வெண்பாக்க மைந்தன் விருப்பு. 18

காட்டிற் கடுந்தரக்குங் கண்ணார் கவினரங்கும்
ஆட்டைக் கலக்கம் அருணையே - கேட்டெழும்பூ
பாளத் திநகரன் பன்மாந் தினகரன்
காளத் திநகரன் காப்பு. 19

இல்லவர்க்கு வள்ளியோ ரீகையுமா னார்கதுப்பும்
அல்லகண்ட மாற்றும் அருணையே - நல்லமுது
நீதி புரியார் நினைத்த படியுரியா
ராதி புரியா ரகம் . 20

போற்றலர்கண் றேண்ணவரும் பொற்புணையை நீவாரும்
ஆற்றலைத்து கைக்கும் அருணையே - யேற்ற
புலிதாய வாசன் புலிதாய வாசன்
வலிதாய வாசன் மனை 21

மேயோர்க்குச் சத்திரமும் வேழக்கு மீளிகளும்
ஆயோ தனமூட் டருணையே - தீயோர்
திடமுல்லை வாயிலார் சிந்தைபலி கொண்ட
வடமுல்லை வாயிலார் வாழ்வு. 22

பூவையர்தோள் புல்லினரும் போர்க்களத்திற் பேய்க்கணமும்
ஆவலங் கொட்டும் அருணையே - தாவி
வருவிடைச்சு ரத்தன் மதுக்குழலி பாகன்
றிருவிடைச்சு ரத்தன் சிலம்பு. 23

சேண்டொடவேள் கோட்டத்திற் றேனிசை கேட்டீர்ம்பொழிலில்
ஆண்டலை யசைக்கும் அருணையே - வேண்டுநரை
நோத கிரியா னுவலருஞ்சீ ரங்கிரியான்
வேத கிரியான் விருப்பு. 24

கார்க்கு நிகர் தடக்கைக் காவலருங் காவலரும்
ஆர்க்கு மளிகூர் அருணையே - போர்க்குநவை
யிச்சிறுபாக் கத்தன் பிலிக்கு மிரங்கியரு
ளச்சிறுபாக் கத்த னகம். 25

பாயகலை நுண்பொருளைப் பாலருநி யாசிகளும்
ஆயத் தியங்கா அருணையே - மாயன்
றுருவக் கரையான் றெழார்க்குக் கரையான்
றிருவக் கரையான் சிலம்பு . 26

வேய்ந்தபுகழ் நாற்சாதி மேவகத்துங் காவகத்தும்
ஆந்தருமஞ் சாரும் அருணையே - காந்தள்
பொரும்பைமா காளத்தார் பூண்டு களிக்கு
மிரும்பைமா காளத்தா ரில் . 27

தக்கவர்சார் மற்றையருஞ் சால்பரத்தி மார்கலனும்
அக்கதை யேற்கும் அருணையே - பிக்கை
யுணாவிற் கலந்தா னுடைதலைக லந்தா
னணாவில் கலந்தா னகர். 28

தாவற்றோர் தாழ்ந்தாரைத் தையலர்கால் சஞ்சலத்தை
ஆவத்துக் காக்கும் அருணையே - தேவியொடு
கொஞ்சமாக் கூடலான் கொஞ்சியங்ஙன் கூடலான்
வெஞ்சமாக் கூடலான் வீடு 29

வாரா வருந்தவர்க்கு மைந்தருமின் னார்விழியும்
ஆரா தநஞ்செய் அருணையே - போராற்றி
யாண்டிக் கொடுமுடியா னாய்முடிய வேளைவென்ற
பாண்டிக் கொடுமுடியான் பற்று. 30

நம்பினார்க்குச் சித்தியொரு நாலிரண்டு மீராறும்
அம்பிகைவ ழங்கும் அருணையே - வெம்பியெழு
நஞ்சைக் களத்தா னராயணன்கா னாக்களத்தா
னஞ்சைக் களத்தா னகம் 31

மையுண்கண்ணார் நுசுப்பும் வண்டலையுந் தண்டலையும்
ஐயம் புகுக்கும் அருணையே - வையைமண்முன்
கல்லைச் சிற்றம்பலத்தன் கௌரியெச் சிற்றம்பலத்தன்
றில்லைச் சிற்றம்பலத்தன் சேர்பு 32

வாக்கியத் தான்றோரு மாலை யினைஞருஞ்சை
யாக்கிரக மண்ணும் அருணையே - நோக்கி
னுருக்கழிப் பாலையா னுற்றிடப்பு ரிந்த
திருக்கழிப் பாலையான் சேர்பு. 33

பூசா கிரியைகளைப் புங்கவர்துன் னாரைமன்னர்
ஆசாரத் தாக்கும் அருணையே - மாசா
மவேதகா னத்தான் வழுத்தலர்கா னத்தான்
சுவேதகா னத்தான் றொடர்பு. 34

செவ்வியோர் நெஞ்சிற் சிறப்புறா வீதிகளில்
அவ்வியமு ழக்கும் அருணையே - தெவ்வை
யுழுமலவி ருப்பா னுளத்தகவி ருப்பான்
கழுமலவி ருப்பான் கலப்பு . 35

தீனமைந்தர் மொய்ம்பாற் றெருவுதொரு மங்கலத்தால்
ஆனகந்தி ளைக்கும் அருணையே - நானத்
தொடைமுடி வள்ளல் சுரிகுழலாள் பங்கன்
கடைமுடி வள்ளல் கலப்பு . 36

மன்னியவேழ் மஞ்சினொடு மால்வரையு மாண்டவரும்
அன்னியமஞ் சாடும் அருணையே - துன்னுபிலம்
விண்ணிப் படிக்கரையன் வெம்பவவே லைக்கரையன்
மண்ணிப் படிக்கரையன் வாழ்வு . 37

கங்கணக ரத்தியர்கண் கண்டாருங் கைரவமும்
அங்கணம் பூக்கும் அருணையே - தங்கண்
விருப்பனந் தாளார் விரவரிய தாளார்
திருப்பனந் தாளார் சிலம்பு . 38

சோதித் தருவுந் துரிய நிலையினரும்
ஆதித் தனைத்தே றருணையே - வேதியர்க
ளோம்பழ னத்தினா ணொண்பழ நத்தினான்
பூம்பழ னத்தினான் பூ. 39

பூமாண் பொழிலிற் புறவத்தில் வேங்கையால்
ஆமா விரியும் அருணையே - சாமாந்தர்
மையாற்றி னையன் மறுத்தஞ்ச லென்றருள்செ
யையாற்றி னைய னகம். 40

தப்பருநீள் காவுந் தளிதொறும்வி நாயகரும்
அப்ப மிசையும் அருணையே - யொப்புயர்வின்
மெய்த்தான மாட்சியான் மேவாத மாட்சியா
னெய்த்தான மாட்சியா னேர்வு. 41

பேசுபுல வோர்மனைப்புன் பேதையரும் வாவிகளும்
ஆசிரியம் பாடும் அருணையே - நேச
மருவானைக் காவான் மருந்தெனக் காவான்
றிருவானைக் காவான் சிலம்பு. 42

இம்மையொடு ஞானியரு மேற்பாருக் கீவாரும்
அம்மை கடுக்கும் அருணையே - யெம்மையாள்
மைஞ்ஞீலி யத்தன் மழுமா னணியத்தன்
பைஞ்ஞீலி யத்தன் பதி. 43

மாசறக்கற் றோர்வாக்கின் மாதரார் பார்வைகளின்
ஆசு கமழும் அருணையே - தேசுடையைந்
தேச்சிலாச்சி ராமமத்தா ரீர்ஞ்சடையா யென்னவருள்
பாச்சிலாச்சி ராமத்தார் பற்று . 44

காசினதி தோய்ந்தவர்க்குங் காரிகையார் தோய்ந்தவர்க்கும்
ஆசை யகற்றும் அருணையே - பேசளவி
னாட்போக்கி யம்மா னளித்தான் றேடும்மம்மான்
வாட்போக்கி யம்மான் மனை. 45

மெத்துகுணத் தார்முனிவும் வேண்ட லர்கண்
மாரதரும் அத்திரமேவும் அருணையே - துத்தி
யராப்பள்ளிக் கண்வளர்வா னம்புயத்தான் போற்றச்
சிராப்பள்ளிக் கண்வளர்வான் சேர்பு. 46

மந்திரிகள் வேறிசைந்த மந்திரத்திற் பொய்கைகளில்
அந்தரங்கஞ் சூழும் அருணையே - நந்த
மடுங்கள வண்ணலா ராசையற்றாற்க் குற்றார்
நெடுங்கள வண்ணலார் நேர்வு. 47

நாயகருடன் சென்ற நல்லாரை வேய்ங் குழலை
ஆயர் குறிக்கும் அருணையே - நேயந்தஞ்
சாந்துருத் திக்கண்ணார் தாமுணர்சோ திக்கண்ணார்
பூந்துருத் திக்கண்ணார் பூ. 48

செம்பவள வாய்ச்சியர்கள் சிற்றிடைக்குங் கட்கடைக்கும்
அம்பர மழுங்கும் அருணையே - தம்புகழ்ச்சிப்
பாற்றுத் துறையார் பவமகலப் பாராத
சோற்றுத் துறையார் தொடர்பு. 49

தேடவருங் கேயமுந் தீர்ந்தொருவா றாற்றுநரும்
ஆடவரைக் கண்ணும் அருணையே - சாடுவிட
முன்குடித் திட்டையன் முன்னோர்க்காத் திட்டையன்
றென்குடித் திட்டையன் சேர்பு . 50

மல்கலரிற் றேனைவண்டும் வாளரவும் புன்மாதர்
அல்குலைத் தூற்றும் அருணையே - பல்கலைதேர்ந்
துள்ளமங்கை யுள்ளா ருணர்விற் புணர்வரியார்
புள்ளமங்கை யுற்றார் புரம் . 51

புங்கவர்கள் பூசனையைப் பூதவேள் விச்சமித்தை
அங்கி கரிக்கும் அருணையே - திங்களணி
நக்கரப் பள்ளியார் நான்முகிலை வேணிவைத்த
சக்கரப் பள்ளியார் சார்பு . 52

கண்டுமொழி யார்மருங்குங் காப்பமைந்த நீண்மதிலும்
அண்டந் தரிக்கும் அருணையே- மண்டுபவ
வேலைத் துறையான் விழாமே யெடுத்தாண்ட
பாலைத் துறையான் பதி. 53

தம்மிலமின் னார்மனையிற் சத்திநிபா தத்தருள்ளில்
அம்மனை யாடும் அருணையே - தம்மிடத்துப்
பத்திமுற் றத்திருப்பான் பாவியர்கள் பாழ்மனத்தைச்
சத்திமுற் றத்திருப்பான் சார்பு. 54

சுத்தமறைக் கந்தணருந் துன்றுகல்லில் வாணிபரும்
அத்த முரைக்கும் அருணையே - சித்தசற்சொல்
கட்டீச் சரத்தான் கருத்திற் கசோசரத்தான்
பட்டீச் சரத்தான் பதி. 55

சந்ததந்தொ ழும்பரன்புந் தாயாரை நந்தனரும்
அந்தரியா கத்தாழ் அருணையே - முந்த
நலஞ்சுழிச் சம்பு நடைத்துரகம் விற்ற
வலஞ்சுழிச் சம்பு மனை. 56

போகுயர்காப் பூந்துணரும் புக்கறியாக் காலனெஞ்சும்
ஆகுல மேயும் அருணையே - யோகை
நடமூக் ககத்தார் நணுக வெளியார்
குடமூக் ககத்தார் குடி. 57

தாரிளைஞர் மார்பகமுஞ் சைவவிபூ திப்பொலி
ஆர மணக்கும் அருணையே - மாரனெய்த
வில்லம் புணர்ந்தான் விழித்தவனைக் கண்டிலா
னல்லம் புணர்ந்தா னகர். 58

தேநந்து செய்யிற் சிவஞா னியருளத்தில்
ஆநந்த மண்டும் அருணையே - தாநவனும்
வேழம்ப மாதரித்தான் வெண்பொடியும் மாதரித்தான்
கோழம்ப மாதரித்தான் குன்று . 59

பெண்மைமிக்கார் கண்ணும் பிறங்கு பொன்னாட்டிற் பரியும்
அண்மைய வாவும் அருணையே- வண்ம
நிறைசை யமலர் நெடுநீர்கொண் டான்றாழ்
துறைசை யமலர் தொடர்பு. 60

மாசில் சுளையினறா வார்கனியை வண்மையரை
ஆசினிதந் தீண்டும் அருணையே - மாசுணத்த
கேயூர வாகரன் கேடிலருட் சாகரன்
மாயூர வாகரன் வாழ்வு . 61

தொக்கவடி யார்மனமுந் தூயதுரு நீற்றுடம்பும்
அக்கவட மல்கும் அருணையே - மிக்கவரா
லெள்ளாறு வந்தா ரிழிகுழிபு கச்சிவந்தார்
நள்ளாறு வந்தார் நகர். 62

ஏரியுறீஇ நீரை யெழுபுயலும் விப்பிரரும்
ஆரியமு கக்கும் அருணையே - பேரியம்பி
யும்பர்மா காள னுவந்தூது மாகாள
னம்பர்மா காள னகம் . 63

எஞ்சுதலில் வேட்டத் திறைவருஞ்சை வக்குழுவும்
அஞ்சுமா னூக்கும் அருணையே - நெஞ்சி
னலதைப் பதியார் நணுகாப் பதியார்
திலதைப் பதியார் சிலம்பு . 64

மாண்டவெழிற் கன்னிமட வாரு மடிமைகளும்
ஆண்டவரை நாடும் அருணையே - நீண்ட
வுருப்பாய் புரத்தா னுமைசேர் புரத்தான்
றிருப்பாம் புரத்தான் சிலம்பு .65

வேலைதோ றன்பினரு மிக்க சுவைக்கரும்பும்
ஆலைய ருமரும் அருணையே - பாலுருவத்
தாழி மிழலையா னம்பகங்கொண் டாழிநல்கு
வீழி மிழலையான் வீடு . 66

சாகாதி யைக்கரியுந் தாம்பரித்தே ரைக்கிரியும்
ஆகார மொக்கும் அருணையே - மோகப்
பெருக லுடையார் பெறாத்தோ லுடையார்
மருக லுடையார் மனை. 67

காண்டகுகி ழாரிலிளங் காலுமெய்யைத் தாபதரும்
ஆண்டுபல வாட்டும் அருணையே - யீண்டுவையை
நீத்தமங்கை யார்வா னிகழ்த்து குறட்களித் தான்
சாத்தமங்கை யார்வான் றலம். 68

கல்லிதய நல்லார் கருங்குழலுஞ் செவ்வாயும்
அல்லி குவிக்கும் அருணையே - மல்லிரித்த
வாகைக்கா ரோணத்தான் மாலுநிரு வாணத்தா
னாகைக்கா ரோணத்தா னாடு. 69

சேமவெண்ணீ றக்குநருஞ் சிற்பரந் தேர்ந்தாருளமு
ஆமய மாயும் அருணையே - வாமத்
தமலா லயத்தா னகநி லயத்தான்
கமலா லயத்தான் கலப்பு . 70

பார்வருமா யுள்வேத பண்டிதரு நீத்தாரும்
ஆர்வ மொழியும் அருணையே - கார்வல்
லிரவையுண் மண்டளியா ரீர்ங்கோதை பாகர்
பரவையுண் மண்டளியார் பற்று. 71

சீலத்தின் வேந்தர் திருப்பவனி யிற்பொழிலில்
ஆலத்தி சுற்றும் அருணையே - சால
வளம ரமருவா ரன்றெயின்மூன் றட்டார்
விளம ரமருவார் வீடு. 72

தீரவுயர் சோலைகளிற் றேசிகர்தம் பொன்மனையில்
ஆரவிட்ட மாட்டும் அருணையே - யேர
மரவீர மாநகரன் மாயமதி லெய்த
கரவீர மாநகரன் காப்பு. 73
கச்சுவிடா தாய்க்குலமுங் கற்பத்தால் யோகிகளும்
அச்சுதனைப் போற்றும் அருணையே - நச்சி
தலையாலங் காட்டா ரருச்சியார்க் கெட்டாத்
தலையாலங் காட்டார் தலம் . 74

விற்பனர்வாய்ச் சொற்பொருளு மெய்யடியார் கண்ணிணையும்
அற்புத மடுக்கும் அருணையே - வெற்பின்
மடவாயி னம்பன் மணிநகைகாட் டென்னுங்
குடவாயி னம்பன் குடி . 75

கோலமக ளீர்விழியாற் கோங்கு விரிநிழலால்
ஆலமர மானும் அருணையே - கால
விரிதிநிய மத்தா னெமைத் தொழுவார்த் தீர்ந்தென்
பரிதிநிய மத்தான் பதி . 76

திண்டடந் தோட்காவலருஞ் சேதாவின் சிஃறுயரும்
அண்டரண்ட மாளும் அருணையே - தொண்டராய்
மற்றோம மன்னன் மறுத்தடைந்தாரைப் புரக்குஞ்
சிற்றேம மன்னன் சிலம்பு . 77

பூதரநேர் போதகமும் பொன்றாக் கொடை முரசும்
ஆதரிக்க வேங்கும் அருணையே - வேதன்
மருவுசாத் தாநத்தன் வாஞ்சாதா நத்தன்
றிருவுசாத் தாநந்தன் சேர்பு . 78

சாடமரில் யானைகளுஞ் சால்வினைப் பொற்கம்மியரும்
ஆடகமு ருக்கும் அருணையே - தோட
மடும்பா வனத்தா னழல்போல் வனத்தா
னிடும்பா வனத்தா னிடம் . 79

வாம்பரியோ டுந்தெருவின் மைந்தருந்தேனைச் சுரும்பும்
ஆம்பல்வாய்த் துய்க்கும் அருணையே - வேம்பன்
றருக்கடிக்கு ளத்தான் றழற்கடிக்கு ளத்தான்
றிருக்கடிக்கு ளத்தான் சிலம்பு . 80

விஞ்சுற்ற தந்நிழன்மேல் வேழமுமே தக்காரும்
அஞ்சக் கரமோ தருணையோ - கஞ்சனுயிர்
வீட்டியத் தான்குடியான் வெய்யவிட மல்லவற்றை
நாட்டியத் தான்குடியா னாடு. 81

ஊக்கமுளார் யாரு முறுகொலையை நுண்ணறிவும்
ஆக்கத் தடுக்கும் அருணையே - பூக்கும்
பெருவலிவ லத்தான் பிரியாவ லத்தான்
றிருவலிவ லத்தான் சிலம்பு . 82

கத்திதீர் கானகத்திற் கற்றவர்செய் காவியத்தில்
அத்தியா யஞ்சேர் அருணையே - பத்திமரீஇ
மைச்சின மாண்டார் மனநச் சினமாண்டார்
கைச்சின மாண்டார் கலப்பு . 83

யாகமனு விண்ணவரை யேற்றத்தார் சீற்றத்தை
ஆகருட ணிக்கும் அருணையே - நாகத்து
மின்றிருவாய் மூரன் மெலவரும்ப நோக்கிமகிழ்
தென்றிருவாய் மூரன் சிலம்பு . 84

மங்கையர்கள் கொங்கையிலும் வான்றுறவர் செங்கையிலும்
அங்கசனம் பெய்யும் அருணையே - நங்கைதும்பைப்
போதா ரணியத்தன் பொன்முடி வளைத்த பிரான்
வேதா ரணியத்தன் வீடு . 85

பம்பிசைக் காரளியும் பஃறொடையைக் காளையரும்
அம்புயத்தி லார்க்கும் அருணையே- யெம்பாற்
றவாதசாந் தத்தான் றகித்தசாந் தத்தான்
றுவாதசாந் தத்தான் றொடர்பு . 86

துச்சரிகட் கான்றோருந் தோகையன்னார் கந்தரமும்
அச்சங் கவிக்கும் அருணையே - நிச்சன்
மனவாயி லுள்ளார் மதிவெறுத் தென்னுள்ளார்
புனவாயி லுள்ளார் புரம் . 87

கஞ்ச முகத்தியர்கள் கையின் மலர்த்தடத்தில்
அஞ்சங் குலாவும் அருணையே - விஞ்சுபய
மற்றால மேயா ரமுதாக்கித் தாமேயார்
குற்றால மேயார் குடி. 88

மின்னனையார் மென்னடைக்கு மேவு மதிதியர்க்கும்
அன்ன மருளும் அருணையே - தன்ம
வுருவாப்ப னூரா னுடையான் சடையான்
றிருவாப்ப னூரான் சிலம்பு. 89

சிந்தனையின் மிக்கீவார் சீர்த்தியும டந்தையரும்
அந்தரதிக் கேயும் அருணையே - சுந்தரர்க்கா
வாடக மேவினா னாற்றிலிருந் தாவிபுக
வேடக மேவினா னில் .90

மைவனத்த வேட்டுவரும் வாரணத்தைக் கேசரியும்
ஐவனம டிக்கும் அருணையே - வைவளரும்
வல்வே லிவருமான் வாகுதந்த சாமிதந்தை
நெல்வே லிவருவா னேர்வு . 91

மிக்கார்வ நீடுதொண்டர் மெய்யைமட வார்மொழியை
அக்கார மூடும் அருணையே - யெக்காலு
நேவைத் திருப்பதியார் நெஞ்சோ வதிலுறையுந்
தேவைத் திருப்பதியார் சேர்பு . 92

ஓங்கார மோர்ந்தா ருளத்திலிளை யார்தோளில்
ஆங்காரந் துஞ்சும் அருணையே - பூங்கணைக்கை
வேடானை வாழ்வான் விழிமுளரி சற்றலர்த்தி
யாடானை வாழ்வா னகம் . 93

மாலதா மாடுகண்ட வெம்புலியுந் தண்பணையும்
ஆலவா லங்காட் டருணையே - சீலத்
தரங்குன்ற வாணர் தமைப்புரியா ரென்றும்
பரங்குன்ற வாணர் பதி . 94

நிட்டா பரருமன்பர் நீடநின்றார் பான்மதனும்
அட்டாங்கஞ் செய்யும் அருணையே - யொட்டாக்
கழியற் பரமா கடியரணங் காய்ந்த
சுழியற் பரமர் தொடர்பு . 95

பாடினர்க்குப் பார்த்திபரும் பலகதியிற் பாய்பரியும்
ஆடிக் களிக்கும் அருணையே - மூடர்
திருப்பத்தூ ரத்த னிடபத்தூ ரத்தன்
திருப்பத்தூ ரத்தன் சிலம்பு. 96

போரரசர் பாழிமொய்ம்பிற் பூசுரச்சிறார் கிடையில்
ஆரணங் கற்கும் அருணையே - கூருகிரி
லூனப்பே ராளி யுரங்கிழித்துக் கொக்கரித்த
வானப்பே ராளி கலப்பு. 97

மாண வுயர்ந்தோர் மனத்திலறச் சாலைகளில்
ஆண வமிகும் அருணையே - வாணியைநீ
மூக்கொடுங் குன்றன் முரணறவென் றஃதரிந்த
மாக்கொடுங் குன்றன் மனை. 98

மானவய வீரர் மகாரினமும் வேதியரும்
ஆனைவலங் கொள்ளும் அருணையே - வானக்கொண்
மூவண வேந்தன் முளரியினான் காண்பரிய
பூவண வேந்தன் புரம். 99

வாகைத்தார் மன்னவரும் வாச்சியமுந் தேங்கமலை
ஆகத்து வைக்கும் அருணையே - பாகத்திற்
காண மலையான் கருமலையான் செம்மலையான்
கோண மலையான் குடி . 100

---

---