திரு ஆனைக்கா உலா என்பது, சோழநாட்டில் காவேரிநதியின் கரையில் அமைந்த ஆனைக்கா என்ற தலத்தில் எழுந்தருளியுள்ள வெண்ணாவலீசர் மீது காளமேகப் புலவர் பாடியது. இதிலுள்ள கண்ணிகள் 461.




ஏரானைக் காவிலுறை என்னானைக் கன்றளித்த
போரானைக் கன்றதனைப் போற்றினால் - வாராத
புத்திவரும் பத்திவரும் புத்திரசம் பத்துவரும்
சத்திவரும் சித்திவரும் தான்.




சீர்பெற்ற தற்பரமாய்ச் சிற்பரமாய்ச் சிற்பரத்து
வேர்பெற்ற நாதமாய் விந்துவாய்ப் - பேர்பெற்ற 1

சோதியாய் மும்மைச் சொரூபமாய் ஐம்பூதத்(து)
ஆதியாய் எவ்வுயிரும் ஆயினோன் - வேதத்து 2

மட்டுப் படாது வளர்ந்தண்ட வான்கனிந்த(து)
எட்டுப் பணைகொண் டெழுந்ததரு - கிட்டுபொருள் 3

ஈவானும் ஈகென்(று) இரப்பானும் ஈஎனவே
ஆவானும் தானாகும் ஆடலான் - ஓவாது 4

தானே சகமாகித் தானே படைத்தளித்துத்
தானே அழித்தருளுந் தம்பிரான் - ஞான 5

விசித வடிவாய் விளங்குஞ் சிகர
ரசித கிரியில் இருந்தோன் - வசனநெறி 6

சம்புதலத் தோன்பால் தடங்கண்டு சங்கரஎன்(று)
அம்புயன் மாதவஞ்செய் தர்ச்சிக்க - நம்பும் 7

பெருஞான பூமிப் பெயர்தலத்துக் கெய்த
அருஞான தீக்கை அளித்தோன் - இருடி 8


ஒருவனடி சேர்வான் பொன் னோங்கல் சூழ் சம்பு
தருவின் அடியிற் றவமே - புரியக் 9

கரத்தில் தவளக் கனியொன்று வீழ
மரத்திற் கனிகருது மற்றக் - கரிக்கொத்த 10

மேனி யுளதிந்த வெண்கனிதெய் வீகத்தால்
ஆன(து) அரற்கமுதம் ஆம்என்னத் - தான்எழுந்து 11

கைக்கொண் டடக்கும் கனியைக் கயிலையிற்போய்
நக்கன் தனக்களிப்ப நன்றென்று - முக்கணான் 12

வாங்கி அருந்திவிதை மாமுனிக்கு நல்கமுனி
தாங்கி அருந்தத் தரிக்குமோ - பூங்கொன்றைத் 13

தாரான் பவளஇதட் டங்கியதன் றோஉடலில்
வேராய் முடியில் வெளிதுரந்து - தேராளி 14

மேக பதங்கரப்ப வெண்ணாவ லாய்எழுந்து
சாகை யொடுதழைப்பத் தானோங்கி - ஓகையுடன் 15

நின்று பரவ நிருத்தன் கருத்துடனே
இன்றுமுதற் சம்புமுனி இப்படிப்போய் - மன்ற 16

நளினமுனி பூசித்த ஞானபூ மிக்கண்
தெளிபிரம புட்கரணி தீரத்(து) - ஒளிர 17

இருப்பாய் உன் நீழலிலே யாமுறைவோம் என்ன
விருப்பால் அவன்வந்து விட்டான் - உருத்திரனார் 18

கற்பித்த அந்நெறியே கஞ்ச முனித்தடப்பால்
பொற்புப் புறமுறையப் புக்கதற்பின் - வெற்பிடித்து 19


நவ்வி அகிலாண்ட நாயகிஞா னக்கேள்வி
எவ்வழிநான் எய்தும் இயல்பென்னச்-செவ்வியாய் 20

நீயும்போய் ஞான நிலத்திலெமை அர்ச்சிஎனத்
தாயும்போய் அந்தத் தலத்தெய்தித் - தூய 21

அயன்தனை நோக்கிநாம் அர்ச்சிக்க வேதான்
இயன்றசிவ லிங்கம்ஏ தென்னப் - பயின்றரனார் 22

அங்கம் பிரியா அகிலாண்ட நாயகியே
எங்கும் சிவரூப மேஅன்றோ - செங்கையினால் 23

ஆத்திமுடி யோனைநீ ஆமென்ற பூதலத்தில்
மூர்த்திகரித் தேத்த முறைமைஎனப் - பூத்தடத்துத் 24

தண்துறையில் நின்றுமையாள் தன்கோவைக் கங்கையுடன்
கண்டுபிடிப் பாள்போற் கரபற்பங் - கொண்டு 25

திரட்டத் திரண்ட செழுநீர்த் திரளால்
அருட்டிக்க வெண்ணாவல் ஆனோன் - திருக்கோயில் 26

சேர்ந்தருளி வீற்றிருக்குஞ் சிற்சம்பு நாதரெனக்
கூர்ந்த திருநாமங் கொண்டபிரான் - சார்ந்தஉமை 27

பேருவகை தோன்றப் பிரியா தனேகநாள்
சீருள மாபூசை செய்ததற்பின் - ஊரின் 28

திருநாமந் தானும்அமு தீச்சுரமே யாகப்
பெருஞானம் போதித்த பெம்மான் - நிருதி 29


திசைதழைக்கப் பின்னிரக்கஞ் செய்யும் பெருமான்
இசைதவத்தால் எவ்விடையீண் டென்று - தசையுடலம் 30

வீங்கவரம் பெற்ற விருத்தா சுரனுயிரை
வாங்கிய வீரகத்தால் வானவர்கோன் - ஏங்கித்தன் 31

நாமத் தடங்கண்டு நாளுந் தொழப்பழைய
வாமத் துறக்கம் வழங்கினோன் - காமச் 32


சமிர மதனால் தணலிதவஞ் செய்ய
நிமிரும் ஒளிகாட்டி நின்றோன் - கமலபதி 33

புட்கரணி கண்டுதவம் பூணப் பொலஞ்சோதி
மட்கலில் லாத வரந்தந்தோன் - உட்கும் 34

மதிதனது பொய்கை மருங்குதவஞ் செய்ய
அதிகவினை தீர்த்த அம்மான் - உததி 35

பருகி உமிழ்முனிவன் பாரொக்க நிற்க
வருபொழுது பூசிக்க வாழ்ந்தோன் - பிரமகிரி 36

நின்று குறுமுனிகை நீங்கிநெடுங் காவேரி
அன்று தொடங்கி அலைக்கரத்தால் - மன்றல் 37

மலர்சிதறி வந்துதொழ வானதிமுன் னான
பலநதியும் வந்து பணிய - நிலைநின்று 38

காட்சிக் கதியருளிக் கண்டுகலந் தாடினர்தம்
நீட்சித் துயர்அறுதல் நிச்சயமே - ஆட்சிமலை 39


கண்ணுதற்கு விண்ணோர்தம் காவின் மலர்பறிக்க
நண்ணுதற்குப் போனகண நாதர்களில் - எண்ணும் 40

மனப்புட்ப வந்தனுடன் மாலியவான் தானும்
இனப்புட்பம் ஆறாடி ஏந்திச் - சினத்தினால் 41

தம்மைத்தாம் சாபித்துச் சார்பான சம்புதலத்(து)
எம்மைப்பூ சித்துய்ம்மின் என்றுவிட - அம்முறையே 42

வெள்வரையிற் புட்பவந்தன் வெள்ளானை யாய்ப்பிறந்து
வள்ளலைவெண் ணாவல்வாய் வந்திறைஞ்சித் - துள்ளிய 43

மாலிய வானுமுரு மாறிச் சிலந்தியாய்க்
கோலியவெண் ணாவற் குடிகொண்டு - நூலிழைத்து 44

நாதன் சடைமுடிமேல் நாவற் சருகுதிரா
ஏதங் கெடப்பந்தர் இட்டுவரப் - போதகங்கண்(டு) 45

அங்கையால் தள்ளிநீ ராட்டியருச் சித்தேகப்
பொங்கர்வா ழுஞ்சிலந்தி போதமுனிந் - தங்கொளித்து 46

யானிட்ட பந்தர் இதுவோ தவிர்ப்பதென
மாநெட்டை வேழம் வருமளவும் - தானெட்டி 47

வேய்த்திருந்த நஞ்சமென மீன்மிடற்றில் தூண்டிலெனப்
பூத்திருந்து பூட்கை புகப்பொறா - தாய்த்திறலின் 48

மிக்க களிறலறி வீழச் சிலந்தியும்அங்(கு)
ஒக்க இறக்க உமைபாகர் - அக்கணமே 49

வாரு மெனஎழுப்பி வாரணத்துக் கப்பொழுது
சேருஞ் சிவலோகச் சீரருளி - ஊரின் பேர் 50

ஆனைக்கா ஆக்கி அருளச் சிலந்திஅடி
யேனைக்கா பின்புநான் இப்புவிக்குக் - கோனாகி 51

நின்னடிமை செய்யஅருள் நீஎன்ன மாலியவான்
சொன்னபடித் தில்லைவாய்த் தொல்லைமுடிச் - சென்னி 52

இனிய சுபதேவன் எண்டொடித்தோள் தோய்ந்த
வனிதையரிற் புட்பவதி வாழத் - தனிமகவாய்ப் 53

போதுவித்துச் செங்கண்ணார் என்னும்பேர் பூண்பித்துச்
சோதி மணிமகுடஞ் சூட்டுவித்துக் - காதலாய்த் 54

தன்னூலிற் பந்தரிட்ட தானத்தில் தாணுவுக்குப்
பொன்னினாற் கோயில் புதிதமைப்பித்(து)- இன்னமொரு 55

தந்திபுகா வாயிலுந் தக்கநவ தீர்த்தமுங்கண்(டு)
அந்தண் மடவார் அனவரதம் - சிந்தித்துச் 56

சேவிக்கு மெல்லைத் திருச்சா லகநலமும்
மாவித் தகநிருத்த மண்டபமும் - நாவல் 57

தருமுனிக்குச் சுற்றெல்லாந் தங்கு கடவுட்
டிருவிருப்புந் தேருந் தெருவும் - அரணும் 58

திருக்கோ புரநிரையுஞ் செய்யக்கண் டுய்ய
அருட்கோலி முத்தி அளித்தோன் - விருப்பஞ் 59

சுரந்த சிலந்திமுடி சூட்டும் பெருமான்
பெருந்திருவெண் ணாவற் பெருமான் - கருந்துளவோன் 60


சேதுவிற்றான் செய்த சிவபூ சையில்அகன்ற
பாதகத்தில் ஒன்றுகால் பாறாது - போதுதலும் 61

தன்நாமத் தாற்ப்ரதிட்டை சன்னிதியிற் செய்திறைஞ்ச
அன்னான் வினைதீர்த் தருளினோன் - இந்நகரின் 62


மண்ணுஞ் சிவலிங்கம் என்றெண்ணி வாராமற்
பண்ணுந்து சொல்மூவர் பாங்காகக் - கண்ணுற்று 63

நின்றேத்தும் பாக்கொண்டோன் நீடென்பு பொன்மலராய்
நன்றேத்தும் ஞான நகரினோன் - அன்றுரகன் 64


மங்கைக் களித்த மணியாரம் காவைஉமை
பங்கற் கழகன் பரிக்கவென - நங்கை 65

பொருந்தா திருப்பதுவும் பொன்னிநீர் ஆழத்
திருந்தார் தொழுங்கழற்காற் சென்னி - பரஞ்சுடரே 66

கொண்டருளு நீஎனப்பொற் கும்ப நீ ரோடுவரக்
கண்டருளித் தாமணிந்த காரணத்தால் - எண் திசையோர் 67

ஆரம்பூண் டாரென் றழைக்கும்பேர் பூண்டார்வில்
நாரம்பூண் டார்பன் னகம்பூண்டார் - பாரிற் 68


பணிவார் பிறப்பறுக்கும் பாதத்தான் வெண்ணீ(று)
அணிவான் அனைத்துலகை ஆள்வான் - இணையில்லான் 69

தேவர் குலக்கொழுந்தா திப்பெருஞ் செல்வனியல்
நாவலன் தூதன் நடப்பெருமான் - சேவுடையான் 70

சோமநா தப்பெருமான் சோதிமறை தேடரிய
காமன் ஆகங்கடிந்த கண்ணுதலான் - சேமமாம் 71

திக்காடை யான்சந்த்ர சேகரன் தில்லையுளா
டிக்காட் டியபின் னிணையழகன் - அக்கு 72

மணியி லழகன் வசந்த னழகன்
அணியும் பணியி லழகன் - துணரான் 73

சரனழகுக் காகந் தழலாகப் பார்த்த
அரனழகுக் காருமொவ் வாதான் - பரமன் 74

சிறக்குந் திருச்சா லகத்தொளிர்தே வேசன்
கறைக்கண்டன் என்னானைக் கன்று - நிறக்கின்ற 75

மாபெருவெண் ணாவல் வடநாவ லிற்கிளர்ந்த
கோபுர மேருநெடுங் குன்றேய்ப்பத் - தீபவொளி 76

சீரா லயமும் திருநீறிட் டான்மதிலும்
ஊரான துங்கயிலை ஒப்பாகப் - பேராது 77

தன்னிருபாற் பொன்கொழித்துத் தாவுங் கனதரங்கப்
பொன்னிந்தி சம்புநதி போலோங்கத் - தன்னகர்சூழ் 78

இப்பதியும் இந்நகரும் இந்த்ரபத முன்னான
அப்பதியும் அச்சுரரும் ஆமென்ன - மெய்ப்புலவோர் 79

மேதகு வித்யா தரரின் மிகவிளங்க
மாதர் அரம்பையரின் வாழ்வுபெறப் - பாதவங்கள் 80

அண்டர்தரு விற்றோன்ற ஆடகப்பொற் றெய்வீக
மண்டலமொப் பான மழைநாடன் - திண்திறலான் 81

மிக்க விழவறா வீதி வளநாடன்
செக்கர்வான் திங்களணி சேகரத்தான்- தக்கதிரு 82


ஆதிரையான் மூல மறையத்தத் தான்மகத்தான்
ஓதமெறி நாகைக்கா ரோணத்தான் - சோதியான் 83

கெச்சைதனி லாடியான் கேதகையொன் றாவணியான்
அச்சமனை யன்றுபுரட் டாசியான் - பிச்சை 84

அடர்ந்திட்ட மாமுனிவர் ஆச்சிரமந் தோறும்
படர்ந்திட்ட மையற் பசியான் - கொடுங்கூற்(று) 85

எடுக்கைக்கு வந்துபிறந் தேங்காத் திகையான்
கடுக்கைத் தொடைமார் கழியான் - பொடிச்சுதையான் 86

வன்னி வளர்க்குஞ்சோ மாசியான் வஞ்சகமே
பன்னுமவர் நெஞ்சத்தற் பங்குணியான் - நன்னீரால் 87

தீவணத்தங் குஞ்சித் திரையான் சிறுவனையாள்
காவணத்தி லேனோர்வை காசியான் - மூவரைவிட் 88

டப்புரத்தா னார்க்கும் அளித்தஉயி ரானியான்
மைப்புரத்தான் தங்கை வலத்தினான் - செப்பரிய 89


அம்பர அம்பரத்தான் அம்பொற் சிலைச்சிலையான்
பைம்பணியி னான்பைம் பணியினான் - செம்பொறியின் 90

கோவான் கோவான்மேற் கொள்ளு மவையவத்தான்
மாவா ரணத்தான்மா வாரணத்தான் - காவாசன் 91

கங்கையினான் கங்கையினான் காசியிலான் காசியிலான்
பைங்கடல்சூழ் பாரிடத்தான் பாரிடத்தான் - செங்கமல 92


அத்த னகத்திருக்கா ளத்தியான் கங்குறைத்த
அத்த னகத்திருக்கா ளத்தியான் - எத்திசையும் 93

வாவிச் சுவேத வனத்தினான் தேடரிய
வாவிச் சுவேத வனத்தினான் - சேவைக் 94

கரிய கமலா லயத்தானாய் வேதற்
கரிய கமலா லயத்தான் - வருக 95

நவிலு மாணிக்க நகத்தான் வலாரி
நவிலு மாணிக்க நகத்தான் - பவளமணிப் 96

பண்ணதி ரேகாம் பரத்தினான் அந்தமறைப்
பண்ணதி ரேகாம் பரத்தினான் - நண்ணி 97

நவமணிய பஞ்ச நதியானென் றேத்து
நவமணிய பஞ்ச நதியான் - எவரையும்வந் 98

திக்காமன் சோதிச் சிராமலையான் ஈன்றசெவ்வந்
திக்காமன் சோதிச் சிராமலையான் - மைக்கோல 99

வாமத்தா னீலி வனத்தினான் நல்கியமெய்
வாமத்தா னீலி வனத்தினான் - நாமத்தா 100

னாலு கவியுடைவெண் ணாவலா னேவலா
னாலு கவியுடைவெண் ணாவலான் - கோல 101


மருத வனத்தான் மழவை வயித்யன்
அருண கிரிக்கோன் அமலன் - மருகல் 102

பறியல் கொறுக்கை பழனம் இவற்றுள்
உறையும் நிருத்தன் ஒருத்தன் - மறைகொள் 103

அடவி யகத்தில் அவியும் விளக்கை
முடுகும் எலிக்கு முடியும் - குடையும் 104

அவனி யனைத்தும் அரசும் அளித்த
சிவனிசை நெக்குஞ் செவியன் - அவனடியின் 105

மெய்க்கணிட்ட அர்ச்சனைக்கு மெத்தமெச்சி விட்ணுவுக்கோர்
சக்கரத்தை யுற்றளித்த தத்துவத்தன் - மிக்கதத்வம் 106

எட்டிரட்டி முப்பதிற்றி ரட்டிபத்தி ரட்டிதப்பு
சிட்டரெட்டு சித்தசுத்த சிற்குணத்தன் - வட்டமிட்ட 107

செஞ்சடையன் சிங்கவுரஞ் சிந்துகொடுஞ் சிம்புளினன்
பஞ்சமுகன் சங்கணியும் பைங்குழையன் - செஞ்சரணங் 108

குஞ்சிதவங் கங்கொள்மினன் கொம்புவிரும்புந் திறல்கண்
டஞ்சனடந் தந்துவிளங் கம்பலவன் - நெஞ்சிலுறை 109

நாதன் பிறந்துழலும் நாயேனை ஆட்கொண்ட
பாதன் பரமன் பரஞ்சோதி - ஆதவன்சூழ் 110

ஆசைகொண்ட சம்புவின்கீழ் ஆறெண் சதுரியுகம்
பூசைகொண்ட சம்புவிறற் பூதேசன் - தேசு 111


குலவும் இடபக் கொடியேற்றி வீதி
உலவுதிரு நாள் தனில் ஓர்நாள் - தலவலயம் 112


மூடும் இருள்தீர முறைசெய்வான் மூரித்தேர்
ஊடு பரிதி உதயமெழ - ஆடகக்கால் 113

செச்சைப் பவளச் செழுந்தரள மாணிக்க
வச்சிரப்ர வாளசித்ர மண்டபத்துப் - பச்சை 114

மயிலை வடிவுடைய மங்கையை இன்சொற்
குயிலை அணைந்து குலாவும் - துயிலை 115

மணத்தகடம் பன்கொடியும் மாயோன்கைச் சங்கும்
உணர்த்த உணர்ந்தமளி யோவித் - தணப்பிலாக் 116

கன்னி முகங்கருகக் கங்கை உடல்வெளுப்பப்
பொன்னி தனையழைத்துப் புல்லியபின் - முன்னிகழ்ந்த 117

போதக மேன்மையாற் போகத்தால் இவ்வூரில்
வேதியர்கள் பூசிக்க வேகொண்டு - சீதப் 118

பனிமண் டலமதியை பைம்பொற் பதியில்
தனிமண் டபத்தில் தவிசின் - இனிதிருந்து 119

வேதமும் மூவர் விளம்பிய வித்தார
நாதமும் கேட்டு நடங்கண்டு - சோதிப் 120


புகையழலில் தந்த புலிபட் டிருக்கத்
தகைய கலைமருங்கில் சாத்திப் - பகுவாய் 121

அரவமணிக் கச்சை அதன்மேல் இசைத்துச்
சரண பரிபுரமும் சாத்திக் - கரதலத்தில் 122

காகோ தரகங் கணங்கவினக் காண்டகுதோள்
மாகோ மளவலைய மாட்சிதர - நாகேசன் 123

அன்றளித்த பேராரம் ஆகத் தழகெறிப்ப
மின்றளிர்த்த பொற்றோடு வீறுபெறத் - துன்றிய 124

நட்சத்ர மாலை நவசந்த்ர மாலையுடன்
அட்சத் திரமாலை ஆங்கிலங்க - வட்சத் 125

தலத்துத் திருமேனித் தாழ்வடங்கள் தாழ
மலர்க்கொத் திதழித்தார் வாய்ப்ப - மலர்க்குவளைத் 126

தாமம் கமழச் சடைநீர் அருவிநிரை
யாமென்ற முந்நூலும் ஆங்கிலங்கச் - சோமக் 127

கிரணாபி டேகம் கிளரக் கரமான்
தருணா மிருகமதம் தாவப் - பரிநாமச் 128

செக்கர் விசும்பில் செறிந்தசிறு காரென்னத்
தக்க கருஞ்சட்டை சாத்தியபின் - சொக்கத் 129


தருணிய செங்கட் சகோரம் படுப்பான்
உருவிலியோ டங்கிரதி ஒப்பப் - பெருவரையின் 130

மங்கை முயக்கத்து மாமுலைமேல் கத்தூரி
பங்க மடங்கப் படிந்ததெனத் - தன்கருணை 131

அன்பர் உளத்திலிருள் வாங்கியன்பு செய்யாத
வன்பர் உளத்தில்விடம் வைத்ததெனத் - தன்கண்கள் 132

மூன்றினுக்கு மாறாத மூடிருளைக் கேடகற்றத்
தான்தரித்து வைத்த தகைமையெனத் - தோன்றச் 133

சிவந்த திருமார்பில் திருச்சாந்து சாத்திக்
கவின்றரச வாசம் கமழப் - பவங்கொள் 134

தணிமா லயனார் தலைமாலை பொற்கிண்
கிணிமாலை தம்மிற் கெழுமப் - பணியின் 135

நிழல்பூத்த வேணியான் நெற்றிக்கண் ஈன்ற
தழல்பூத்த நீறு தயங்க - எழில்பூத்த 136

செவ்விக் கமலத் திருமுகமும் சோதிதரக்
கைவைத்த வீரமழுக் காட்சிதர - எவ்வழகுக் 137

குண்ணாடும் அன்ப ருளத்தில் தியானம்போல்
கண்ணாடி காட்டுவதும் கண்டருளி - வெண்ணாவல் 138


மாமுனியும் தாமும் வருவதெனத் தண்தரளத்
தாம மணிக்கவிகை தானிழற்றச் - சேமத் 139

திருவாடு தண்டில் சிறந்தேறித் தேவர்
மருவா டகவாயில் வந்து - சுரலோக 140


ஆனென்னப் பூலோக மங்கை தவப்பேறு
தானென்ன மேருவென்னத் தாருவென்ன - ஞானக் 141

கடற்கானச் சோங்கென்னக் காட்டுகதி யென்னத்
தடக்கா சினிதவப்பே றென்ன - விடைக்கொடிநின்(று) 142

ஆடுநவ ரத்ன அலங்கார ஆடகத்தேர்
ஊடு கவுரி உடனேறி - நீடுதிருக் 143

கொற்றக் குடைசதுக்கம் கோலநிலாப் பந்தரின்கீழ்
நற்றுப் பணிசத்ரம் நன்கமைய - முற்றுகமழ் 144

மந்திர வட்டத்து மாயன்தன் வந்தனைபோல்
சந்திர வட்டங்கள் தாந்தயங்கச் - சிந்துரமேல் 145

பிச்ச மனேகம் பிறங்கப் பெருங்கடல்சூழ்
வைச்ச தரங்க வகைமான - மெச்சுவார் 146

ஆசி புடைசூழ ஆலால வட்டமிட
வாசமுறு முத்தின் அடைப்பைவரப் - பாசமும் 147


அங்குசமும் கோடுங்கொண் டைந்துகரத் தண்ணலார்
வெங்கண் அடல்ஆகு மீதேறச் - செங்கண்மால் 148

கந்தன் விரிஞ்சன் ககவா கனத்தேற
இந்திரன் சாத்தன் இபத்தேறச் - சந்திரனும் 149

சங்கநிதிக் கோவும் தரளவிமா னத்தேறச்
செங்கதிர்கள் ஆறிரண்டும் தேரேறப் - புங்கவங்கம் 150

ஏறும் உருத்திரர்கள் ஏறவே தோகையன்னத்
தேற வசுக்கள் எரிக்கடவுள் - மாறி 151

ஒருமையில் ஏற ஒலிகலை ஏற
எருமையில் ஏற இயமன் - வருணன் 152

சுறவேறக் கோளரியில் துர்க்கைஇனி தேற
வெறிசூல வைரவனாய் ஏறத் - திறல்படைத்த 153

காளி கடியேறக் கந்திருவ ருஞ்சுரரும்
மூளும் எழிலி முதுகேற - நீளருகர் 154

சேரக் கழுவேறத் தென்மதுரை ஏறினோன்
ஆரச் சிவிகை அதிலேறப் - பூரிக்கப் 155

பாடும் புலவர் பரியேறப் பாணியிற்றூ
ணோடு திறம்பா உரைத்தோனும் - கூடலிலே 156

சம்பு பரியழைத்த தக்கோனும் தண்டேறச்
செம்பொற் றடமவுலிச் செங்கணான் - வெம்புரவி 157

மேவிவர மீனவரும் வில்லவரும் மெய்த்தவத்தோர்
யாவரும் ஏத்தி இறைஞ்சிவரப் - பூவில் 158


எதிரின் றியநாற்பத் தெண்ணா யிரரும்
பதினெண் மடத்திற் பயிலும் - முதலிகளும் 159

வேழஞ்செய் பூசைபுரி வேதக் கவுசிகரும்
சோழன் கொணர்ந்தநதிச் சோழியரும் - ஆழிசூழ் 160

தந்த்ரப் பெரிய சரணம் அறைவோரும்
மந்த்ரச் சிவமா மறையோரும் - எந்தைமுடிக் 161

கங்கா சலமரபில் வந்துசிவ காரியத்தைத்
தங்காத லால்புரியும் தக்கோரும் - பைங்காதல் 162

ஆரியப் பட்டரும் அன்பால் அகங்குழைந்து
சீரியப்பாட் டோதும் திருப்பெயரும் - நேரிலான் 163

சுந்தரனை யாண்டநாள் தொல்லா வணவோலை
வந்தவையில் வாசிக்கும் மந்திரிகளும் - இந்துநுதல் 164

கன்னலுரை கொவ்வையிதழ் காரளக பாரதனத்(து)
அன்னநடைத் தேவ ரடியாரும் - கன்னிக் 165

குமாரராங் கோயில்கைக் கோளக் குழாமும்
உமாமதியாம் கண்காணி யோரும் - சமுகப் 166

படைவயி ராவிப் படையும் பரன்தாள்
அடையும் அகம்படி யாரும் - கடலுலகத் 167

துள்ள தபோதனரும் உட்சமயத் தோர்யாரும்
தெள்ளிய பாவலரும் சென்னியரும் - வெள்ளமென 168


எங்கும் திரண்டுவர ஏற்றுக் கொடியீண்டச்
சங்கும் குழலும் தடமுரசும் - வங்கியமும் 169

மத்தளமும் பேரிகையும் மண்முழவும் விண்முழவும்
எத்திசையும் ஒத்திசைப்ப யாழின்முரல் - மெத்து 170

சகமேவு தேவர்கள் தம்பிரான் வந்தான்
மகமேரு வில்வளைத்தான் வந்தான் - பகஇப் 171

படியிடந்து மாலறியாப் பாதத்தான் வந்தான்
வடிவழகுக் காருமொவ்வான் வந்தான் - விடுநூல் 172

சிலந்திமுடி சூட்டும்சிவன் வந்தான் செவ்வி
மலர்ந்த முகமுடையான் வந்தான் - தலமளந்த 173

தாளுயர்க்கும் புள்ளூர்தி தம்பிரான் வந்தானென்(று)
ஆளுமொற்றை எக்காளம் ஆர்ப்பெடுப்பக் - கூளிகுறள் 174

சுற்றும் கவர்ந்துவரத் துள்ளுமக ரத்துவசன்
வெற்றிச் சிலைக்கொடிசே வித்துவரப் - பொற்றொடியார் 175


தோரண வீதிதனில் தோன்றினார் தோன்றுதலும்
ஆரண நாட்டின் அரம்பையரும் - நாரணனார் 176

வைகுண்ட லோகத்து மங்கையரும் வாகனமாம்
பெய்கொண்ட லோனுலகில் பெண்படையும் - மொய்கதிரின் 177

மண்டலத்துக் கன்னியரும் மாநாக மங்கையரும்
எண்டிசை வெற்பிலுள்ள ஏழையரும் - கண்டுருகி 178

மானிட மங்கையராய் மண்டபத்தும் கோபுரத்தும்
மீனுடைய விண்தோய் விடுதளத்தும் - ஏனைக் 179

கடையினும் முன்றிலினும் கற்புரிசை சூழ
விடையினும் வீதியினும் எய்தி - மடவீர் 180


விருதேற்ற வேள் பரவும் வெண்ணாவ லீசர்
வருதேர்ப் பவனி தொழ வாரீர் - எருதேறித் 181

தும்பைச் சடைப்பிறையைச் சூழ்செக்கர்வான் போலும்
செம்பொற் றிருவா சிகைபாரீர் - வெம்பணத்தில் 182

அங்கணுல கெல்லாம் அடக்கும்அரா இவர்க்குக்
கங்கண மான கவின்பாரீர் - தங்கைக்கு 183

வாய்த்தமண வாளனார் என்றறிந்து மைத்துனனார்
சாத்தியவங் கண்மணித் தார்பாரீர் - நேத்திரங்கள் 184

மூன்றினிடை யூடே முயங்குமிருள் மாறிப்போய்த்
தோன்றும் புருவத் துணைபாரீர் - வான்தரளத் 185

தோடிருந்து காதுறைவார் யாழிசைக்கோர்
சோதிகரத் தூடிருந்துதாவும் உழைபாரீர் - தாள் தொழுது 186

சேகரத்தா ரானார்தம் சென்மவினைக் கோள்தீர
மாகரத்தில் ஏந்தும் மழுப்பாரீர் - பாகத்தில் 187

நன்றாய்க் குடியிருந்து நாதனையும் கங்கையையும்
ஒன்றாக்கி விட்ட உமைபாரீர் - நின்றேத்தும் 188

தையலார் மேனியெலாம் தன்னிறமாய்த் தோற்றுவிக்கும்
துய்யபூங் கொன்றைத் தொடைபாரீர் - பையவெனச் 189

செல்வார்தம் காதலெலாம் தென்னானைக் காவார்க்குச்
சொல்வார் எமக்கருளாய் தோளென்பார்- வில்வாங்கி 190

எண்கொண்ட பூங்கணைவேள் எய்தவடுத் தேவரீர்
கண்கொண்டு பாரீர் கடிதென்பார் - ஒண்கண்கள் 191

செங்காலில் சாத்தித் திருந்துமா லாமெமக்குச்
சங்காழி தாரீர் தனித்தென்பார் - வெங்காதல் 192

பேதையர்மாட் டில்லையோ பின்னிரக்கம் செய்வாரென்(று)
ஓதுதிரு நாமமுமக் கேதென்பார் - தாதிதழித் 193

தேமாலை மார்பீர் செழுநீர்த் திரளாகில்
யாமாட வொட்டாத தென்னென்பார் - கோமானே 194

வெங்கைவே ழம்செய்த பூசைபோல் வெவ்வினையேம்
கொங்கைவே ழம்செய்யக் கொள்ளென்பார் - எங்கள் 195

செழுநீர்த் திரளாம் திருமேனி எல்லாம்
கழுநீர்த் திரளாகக் காண்பார் - அழுநீர் 196

கடலிற் றனிமையினா கத்தைக்காண் பார்பூ
மடலிற் கைவைப்பார் மகிழ்வார் - வடிவழகர் 197

உற்றார் எமக்கென் றுருவெளியில் ஓடிப்போய்
முற்றா முலையின் முயங்குவார் - சொற்றான் 198

அயர்வார் கலைநாண் அகல்வார் அறிவு
பெயர்வார் அவரிலொரு பேதை - கயிலைக் 199


கடவுட் பகவன் களவுநூல் தன்னை
அடிவரவு தீட்டும் அலேகம் - புடவிபுகழ் 200

சீரானைக் காவான் திருக்கொணாச லப்புரத்துப்
பேரானை யீனாப் பிடிக்குருளை - சூராலங் 201

காட்டில் பயில்நடத்தோன் கச்சியே காம்பரத்தில்
கோட்டில் பயிலாக் குயிற்பிள்ளை - மூட்டமரின் 202

மண்டலகைச் சேனையோன் மாணிக்க மாமலைசூழ்
கொண்டலிடிக் காடாக் குழாமஞ்ஞை- முண்டகக்கண் 203

என்னானைக் கன்றார் இமையத்தார் கைத்தலத்து
மன்னா துலவு வனக்கன்று - தன்னேர் 204

அடியார்க் கெளியான் அனமேவு பொய்கை
படியாக் களியன்னப் பார்ப்பு - விடையான் 205

சடையி லடங்கும் சலம்போற் றடத்தூண்
இடையி லடங்கும் இறைபோல் - வடதருவின் 206

வித்தி லடங்கும் விதையைப்போல் மேகசரீ
ரத்தி லடங்கும் அசனிபோல் - அத்தி 207

உழையி லடங்கிய ஓங்கல்போல் ஊதுங்
கழையி லடங்கும் கனல்போல் - விழைபொய்கைத் 208

தோயத் தடங்கும் துணைத்தா மரைமுகைபோல்
காயத் தடங்கும் கனதனத்தாள் - தாயிற் 209

சிறந்தபிரா னல்லாத தெய்வங்கள் போலே
இறந்து பிறக்கும் எயிற்றாள் - நறுங்கொன்றை 210

நீரங்கொள் வேணியர்பைஞ் ஜீலி வனத்திலதி
காரங்கொள் ஏமன்போல் கண்ணினாள் - தேரில் 211

பருதி அகன்றகலாப் பக்குவத்தில் கங்குற்
குருதி யனைய குழலாள் - கருதில் 212

பெரிய வடநூற் பிரகிருதர் பாடைக்
குரிய குதலை உரைப்பாள் - எரிகின்ற 213

நந்தா மணிவிளக்கை நாடும் குறளிபோல்
செந்தா மரையென்னச் சிந்திப்பாள் - முந்துகதிர் 214

துன்றிச்சூ ரக்கடவுள் தூரத் தெழுந்தோறும்
குன்றிச்சூ டென்றள்ளக் குந்துவாள் - அன்றி 215

மகத்தில் எழும்பிறையை வாவென் றுரைப்பாள்
அகத்தி முகைகண் டயர்வாள் - மிகுத்த 216

செழுங்கமுகின் செந்தாதைத் தீயென்று வண்டற்
குழந்தையைக்கொண் டேகக் குறிப்பாள் - முழங்கும் 217

ஒருவர் இதற்குள் உளரென்று மென்தோற்
கருவி உடைக்கும் கருத்தாள் - நிரைமகுட 218

மாட மணிமுகட்டில் கார்கண்ட வண்ணமயில்
ஆட வளைக்கைவிரித் தாடுவாள் - கூடல்வாய்த் 219

தொல்லானைக் காவுடையான் சூழ்ந்தவிளை யாடல்போற்
கல்லானை முன்னம் கரும்பளிப்பாள் - முல்லைக் 220

கொடிக்குயின்ற பந்தல்தனைக் கோட்டிக் குழிசி
யிடைப்புளின அரிசியுலை ஏற்றி - அடர்தரளச் 221

சிற்றி லகத்தில் சிறுசோ றமைத்தருந்தச்
சுற்றில் விருந்தழைப்பாள் சோதிமணி - முற்றத்து 222

வந்தனள் அவ்வளவில் வாய்த்தசிறுத் தொண்டர்பால்
முந்த விருந்துண்ட மூர்த்தியான் - தந்திவனத்(து) 223

உள்ளான்மண் காக்கைக் குரியா னிலும்வலியான்
அள்ளா விடமுன் அருந்தினான் - வெள்ளானை 224

பூசிக்க வீடளித்துப் புன்சிலந்தி சூட்டுதற்கு
மாசித்ர மௌலி வழங்கினோன் - தேசுதிகழ் 225

தீத்திரள் எங்கள் செழுநீர்த் திரள்தேவர்
பூத்திரள் சிந்திப் புடைசூழ - ஏத்துமறை 226

நாற்றுரகத் தேற்றதலம் ஞாலத்து நாணாகித்
தோற்றுரகத் தேற்றுத் துவசத்து - வேற்றுச் 227

சுடருருளைத் தேரின்மேல் தோன்றுதலும் ஈன்றோர்
வடமணியல் குற்றேரில் வந்தாள் - உடனே 228

தொழத்தொழுது பூசித்துத் தூவி மடமாதர்
நிழற்குநிழல் தானாக நின்றாள் - தழற்கரத்தோன் 229

கொன்றைச் சடாமுடிமேல் கொக்கிறகும் நக்கறுகும்
கன்றுகதிர் வாளரவும் கச்சபமும் - சென்றசென்ற 230

எல்லா உகாந்தத்தும் ஈசற் கொருதிவசம்
செல்லாது காட்டும் சிறுபிறையும் - நல்லிசையின் 231

வாணர் படைவீடும் முச்சுடரின் மண்டலமும்
காணரிய நீலமணிக் கந்தரமும் - மாணிக்கக் 232

கேயூர வாகும் கிரிதனையும் மானுமொரு
மாயூரம் நீங்காத வாமமும் - சேயவொளித் 233

தெக்கண பாகமும் செங்கைத் தமருகமும்
அக்கணியும் அக்கினியும் ஆகமும் - ஒக்கச் 234

செழியா விருமென்று சேர்க்குமடி யார்க்கு
வழியான உந்தி மடுவும் - உழுவை 235

அதளுடையும் அம்பலத்துள் ஆடிச் சிவந்த
சததளமும் கண்டுருகித் தானே - புதிய 236

இவரை விருந்தழைமின் என்றாள் அதுகேட்(டு)
உவகைமிகுந் தன்னைமார் உன்போல் - தவமுனிவர் 237

மாதரிட அறிந்தார் இல்லையோ மால்கொண்ட
ஆதரவால் நீயமைத்த ஆரமுதம் - மேதினிதான் 238

அன்றோ அதுபரமர்க் காகா தவர்விடைக்காம்
என்றோத ஏதிவர்க்காம் என்றாளை - நின்றோர்பார்த்(து) 239

ஆலால முண்டுகளித் தாரமுதம் உண்டுபதி
னாலாநா ளுள்ளும் நவமதியின் - மேலான 240

ஆதிப் பெருஞ்செல்வர்க் கன்னமே ஏதரிது
பேதைப் பருவம்போய்ப் பேரணங்காம் - போதழைத்து 241

வேண்டிய இன்ப விருந்திடுநீ என்றளவில்
காண்டகுதேர் வீதி கடந்ததால் - ஆண்டவர்க்கிங்(கு) 242

ஊட்ட நினைப்பாள் உமைபோலும் என்றுவந்து
வாட்ட நினையா மதன்சென்றான் - கூட்டகத்து 243

வல்லியார் எங்கட்கு மானே விருந்திடென
இல்லிடைகொண் டேகினார் ஈண்டொருத்தி - அல்லி 244


உறங்குகணை வேளார்க் கொருநாட் கொருநாள்
பிறங்குகரும் பன்னாள் பெதும்பை - நிறைந்தபொருள் 245

வித்தைபோ தாதெனினும் வேள்நூலி லேசிறிது
தத்தைபோல் கற்றுத் தனித்துரைப்பாள் - மெத்த 246

நிரம்பாச் செயலால் நெகிழ்ச்சியால் முக்கண்
அரன்பாதத் தம்புயப் போதன்னாள் - திருந்தஇவள் 247

ஆலிங் கனமே அமையும் எனத்தேவர்
மாலிங் குறலா வனப்பினாள் - மேலன்பு 248

மையொத்த கண்டன்பால் வையா தவர்மனம்போல்
மெய்யொப் பனைதான் விரும்புவாள் - மையல் 249

தருசுரத மும்பிறவும் தான்வளர்த்த வேட்டுக்
குருகுகளில் கண்டறிந்து கொள்வாள் - அரனார் 250

சகங்காயும் கூத்துச் சமைந்துதிரை நின்று
முகங்காட்டு மன்ன முலையாள் - அகங்கைப் 251

பலியுகந்த தம்பிரான் பத்தியர்போல் இன்பம்
கலியுகந் தட்டாத கண்ணாள் - சிலைமகரம் 252

காட்டுதுலை மீனலவன் கன்னியிலுண் டானமழை
கூட்டரவில் கூட்டுங் குழலினாள் - வீட்டடுத்த 253


சீதளக் காவில் சிறுதென்ற லூடாடும்
மாதவி நீழலிலே வந்திருந்து - தூதியரும் 254

பாங்கியரும் அன்னையரும் பார்க்கவொரு பாவையுடன்
யாங்கழங் காடுதும் என்றமைந்து - வாங்கினாள் 255

ஒன்பான் மணியதனில் ஓரேழ் மணிதிரட்டி
இன்பான கோளேழ் எனத்திகழத் - தன்பாணிப் 256

பல்லவத்துள் எல்லாம் பவளமா ணிக்கமொழிந்
தில்லை யெனவிளங்க ஏற்றெறிந்து - தொல்லோன் 257

படர்கயிலை வெற்பெடுத்த பத்திருதோள் வீரன்
உடல்சரிய ஊன்றியதா ளொன்றும் - மடலவிழ்பூந் 258

தேங்காவி சூழும் திருவானைக் காவிலுறை
ஓங்கார மூர்த்தி உருவிரண்டும் - ஓங்கற் 259

கொடிக்கன்பு கொண்டபிரான் கோலமூன் றாக்கி
முடிக்கும் திருக்கருமம் மூன்றும்- அடைக்கலமென்(று) 260

ஏத்தெடுக்கும் எம்மை எழுபிறப்பின் வீழாமற்
காத்தெடுக்கும் நாதன் கரம்நான்கும் - பூத்தொடுக்கும் 261

தார்காக்கும் செஞ்சடையான் சங்கரிக்குநாள் வரைமால்
பார்காக்கத் தந்த படைஐந்தும் - போர்காட்டும் 262

திண்பினா கப்படையான் சேவடிசே ரத்தவம்செய்
பண்பினார் வெல்லும் பகையாறும் - ஒண்பார் 263

திருந்து விடங்கரெனத் தேற்றும்பா ரேத்த
இருந்த இடங்கள்தாம் ஏழும் - மருந்தனையாள் 264

பாடிவிளை யாடும் பருவத் துருவத்துக்
கூடிவிளை யாடுமலர்க் கொம்பினாள் - நீடு 265

வலியைக் கருதாமல் மாதவத்தோர் விட்ட
புலியைக் கலையாப் புனைந்தோன் - உலகனைத்தும் 266

ஆண்டவன்கா கோதர ஆபரணன் ஆனந்தத்
தாண்டவன் சிந்தூரச் சரணத்தான் - நீண்டவனுக்(கு) 267

எட்டாத நீளத்தான் எள்ளெண்ணெய் போலுடலின்
உட்டான் உயிராய் உறைகின்றான் - புட்டாவு 268

விண்தடவு கோடரத்து வெண்ணாவல் வாய்ச்சிலந்தி
கண்ட நிழலிலுறை கங்காளன் - அண்டர் 269

அடிபரவும் ஆதிப் பெருஞ்செல்வன் அத்தன்
வடிவழகுக் காரும் ஒவ் வாதான் - சுடருருளைச் 270

செம்பொற் றிருத்தேர்மேல் தோன்றுதலும் சேயிழையும்
அம்பொற் கழங்காடல் ஆங்கொழித்துத் - தம்பிரான் 271

சேரும் திருவீதி சென்றாள் திரண்மாதர்
யாரும் இறைஞ்ச இறைஞ்சினாள் - தாரும் 272

திரண்ட சதுர்ப்புயமும் செம்முகமும் கண்டாள்
இரண்டு விழிக்கடங்கா தென்றாள் - மருண்டுதொழு 273

தாதரித்துத் தாயரைப்பார்த் தன்னைமீர் என்னையிவர்
மாதரித்த திண்தேரில் வைம்மினென - நாதனார் 274

தாமேறும் தேரில் சதுமுகவற் கல்லாது
யாமேறப் போதா தெளிதன்றே - யாமெல்லாம் 275

தீண்டற் கரியதுகாண் தெய்வத் திரட்சிகாண்
காண்டற்கு வாய்த்தசங் கற்பங்காண் - ஆண்டவர்கைத் 276

தீயுளது காண்சடையிற் செங்கண் அரவுகாண்
பாயும் எருதுளகாண் பைந்தொடியே - நீயடர்ந் 277

தேகத் தொழாயென்றார் என்சொன்னீர் தேறிலிவர்
பாகத் திருப்பாளைப் பாருமென - மோகம் 278

குடிபுகுந்த தென்றெண்ணிக் கோதையர்கொண் டாடி
வடிவுடைய மங்கைக்கு மாறா - யடியிட்டாள் 279

ஆகா வெனநகைக்கும் அவ்வளவில் ஆடகத்தேர்
ஏகா அயல்வீதி எய்திற்றால் - மாகாமன் 280

இப்பாவை யையெய்ய எண்ணுவன்எண் ணானாகி
ஒப்பாரிலாதா ருடன் சென்றான் தப்பியே 281

நிற்கின்ற மானை நிரைவளையார் தாம்பூரை
இற்கொண்டு சென்றார்பின் ஈண்டொருத்தி - பொற்குன்று 282


அனசம்பு நாதன் அயன்மேவு பொய்கை
வனசம் பொருமங்கை மங்கை - தனதிடப் 283

பங்குமைக் கீந்தோன் பதியைத் தனதாக்கும்
குங்குமக் கொங்கையாள் கொங்கையாள் - பைங்கயிலை 284

ஆதியான் காவேரி யாற்றில் அறல்போலும்
ஓதியாள் காமகலை ஓதியாள் - பாதியாம் 285

பெண்ணினான் ஆதிப் பெருஞ்செல்வன் ஆனைக்காக்
கண்ணினாள் வேலனைய கண்ணினாள் - நண்ணியசீர்த் 286

தந்தியரா மத்தனார் தாமச் சடாடவியில்
உந்தியா ளச்சுழிபோல் உந்தியாள் - எந்தை 287

இணங்கிய வெற்பின்கீழ் எதிர்ந்ததோர் காலன்
வணங்கிய ரோம வலியாள் - அணங்கனைய 288


தன்பருவ வல்லியரும் தானுமணிச் சாளரத்துப்
பொன்புனையும் ஆடரங்கில் புக்கிருந்து - மின்பந்து 289

மின்னிடை தாங்குவன வித்தாரம் மெத்துவன
மன்னிய முத்துநவ ரத்தினவாய் - தன்னிரண்டு 290

கொங்கையுடன் மாறுகொண்ட கோட்டுப் பிழைக்கவற்றை
அங்கையினால் வாங்கி அறைந்தெறிந்து - சங்கரனைச் 291

சொல்லார் எழுபிறப்பும் சுற்றித் திரிந்ததென
எல்லா அவையவத்துள் எய்துவித்தும் - நில்லா(து) 292

எழுவித்தும் வெள்ளியில் அக்கினி கால்வீழ்
பொழுதொக்க நிற்குமயில் போன்றும் - செழுமை 293

திருந்திய கொம்பிற் செறிகனிக்குப் புட்கள்
பொருந்தி எழுந்தகல்வ போன்றும் - சுரும்பு 294

மருமுளரிக் காட்டிணங்கு மாபோன்றும் மாரன்
பொருபுரிந்து சூழ்கதண்டு போன்றும் - ஒருதன் 295

மிகுவினைகள் கண்டோர் விழிக்குலமும் நெஞ்சும்
புகுவன போவன போன்றும் - திகழ்தரவே 296

நின்றாடி னாளை நிரைவளையார் தாம்பூரை
என்றாகம் புல்லி இலங்கிழையாய் - உன்தொழிலை 297

யாமோகொண் டாடுவோம் ஆனைக்கா ஈசனார்
தாமே அறியத் தகும்என்ன - ஆமே 298

அவரறிவா ராமாகில் அவரே எனக்கா
னவர்வதுவைக் கென்று நவின்றாள் - சிவரூபம் 299

காண்டற்கு வேண்டிக் கவின்திருத்திக் காரிகையார்
ஈண்டிப் புடைசூழ இல்நின்று - நீண்ட 300

கனகநிலை ரத்னக் கதவுகடை நீக்கி
இனிய தெருமருவும் எல்லை - புனிதன் 301

திருந்து செழுநீர்த் திரளான் தெய்வீகப்
பெருந்திருவெண் ணாவற் பெருமான் - அருங்கொல்லி 302

நேரி மலையுடையான் நீலநெடுங் காலனுடல்
சோரி முடைநாறும் சூலத்தான் - பேரிமய 303

மாதக லாதுறையும் வாமபா கத்தினான்
சீத கலாச்சந்த்ர சேகரத்தான் - போதன் 304

சுரபேத வேதத் துரகத்தேர் தூண்டி
வரவே பவனி வரலும் - புரிகுழலாள் 305

சென்றாடி வேதச் செழுநீர்த் திரள்வந்தான்
என்றாடிப் பாடி இறைஞ்சினாள் - கொன்றை 306

அலங்கல் அழகர் அடியேற் கிரங்கி
இலங்கு புயமளித்தால் என்னாம் - கலங்கினேன் 307

என்னைஇடப் பாகத் திருத்தினால் யானவள்போல்
உன்னை இரந்துழல ஒட்டேனே - கன்னியைப்போல் 308

மேதகு முப்பத் திரண்டறத்தை வீசியுனக்(கு)
ஓதக் கடல்நஞ்சை ஊட்டேனே - கீதவிதம் 309

சீராகப் பாடித் திருக்கூத்தி லுந்துணையாய்ப்
பேராது நிற்கப் பெறுவேனே - வாராய்என்(று) 310

ஓது மளவில் உமையாள் முகம்நோக்கி
ஆதி முறுவல் அரும்பினான் - மாதை 311

எவரும் நகைத்தார் இரதிபதி யேதான்
அவிருமணித் தேர்கண்ட தப்பால் - இவளொருத்தி 312


அந்நாள் உததிதரும் ஆரமுதுக் காரமுதாம்
பொன்னா பரணத்தின் பூணாரம் - அன்னாள் 313

விழிவேளைத் தந்தானை வில்வேளை மெய்யே
வழிவேளை யாளும் மடந்தை - எழில்மேனிக்(கு) 314

அன்றன் றணிந்த கலந்தோறும் ஆதுலருக்(கு)
என்றும் கொடுக்கும் இயல்பாளை - நின்றொருநாள் 315

கீதம் விரவி ஒருத்தி கிளர்கீர்த்தி
ஓத அமைந்தெதிர்நின்(று) ஓதிமமே - மாதர்க்(கு) 316

அரசே மணியே அமுதே அனங்கன்
சிரசே கரமே திருவே - கருணைக்கு 317

நீயே உமையென்றாள் நேரிழையும் நானுமையேல்
தூயோனைக் சேரேன் கொல் என்கின்றாள் - ஆய அருட் 318

கங்கைநீ என்றாள் அவளாகில் கண்ணுதல்மேல்
தங்குவ னேஎன்று சாற்றினாள் - கொங்கை 319

பொருப்போஎன் றாள்அப் பொருப்பாகில் ஈமத்
திருப்போன் இருக்குங்காண் என்றாள் - இருப்புருவம் 320

பொற்றனுவோ என்றாள் அஃதாகில் புராரிகரம்
பற்றிவளை யாதோ பகர்என்றாள் - நெற்றி 321

பிறையோஎன் றோதினாள் பெய்வளையும் அப்போ(து)
இறையோன் முடிக்குமே என்றாள் - நறைமலர்க்கண் 322

மானோ விடமோ எனவுரைத்தாள் மன்றாடி
யானோன் தரிக்குமே ஆங்கென்றாள் - தானதும் 323

ஆராமல் தன்னை யறிந்து சிவன் ஆகத்துக்(கு)
ஏரா தவளோ நீ என்றேத்தப் - பேராசை 324

வல்லியும் வந்து மணிப்பூ டணமெறிந்து
புல்லி விடஅவளும் போந்தோறும் - சொல்லுதலும் 325

தன்காதல் தானே தனக்குத் துணையாக
மின்காமன் அம்பினால் வெம்பினாள் - நன்காஇப் 326

பாய லதனைப் பணியென்றாள் பாவைநோய்
தாயர் அறிந்தணுகித் தையலே - நீயஞ்ச 327

வேணுமோ உன்னை வினவியே வெண்ணாவல்
தாணுமோ கங்கொண்டு தானாளைக் - காண 328

எழுந்தருள்வன் நின்வாசல் என்றுமத வேளும்
அழுந்தண் சமீரனா வோனும் - செழுஞ்சடையில் 329

தாங்கிய சந்திரனும் தாமூர் மழவிடையும்
ஈங்குவரக் காட்டினார் என்றேத்த - ஆங்கவளும் 330

கங்குற் கடல்நீந்திக் காலை அவன்வருமென்(று)
அங்கத்தைப் பூணால் அலங்கரித்துத் - தொங்கல் 331

அளக முடித்திடையில் ஆடை இறுக்கி
வளைகள் திருத்திவிழி மையிட்(டு) - ஒளிர்திலகம் 332

நெற்றிக் கெழுதி நெறிமேல் விழிவைத்து
மற்றொப் பிலான்மேல் மனம்வைத்து - முற்றாத் 333

தனத்தியர் சூழ எதிர்கொண்டு நின்றாள்
அனத்தினூ ருந்தேரி னானும் - தனத்தினனும் 334

மாலும் மகவானும் வந்திப்பத் துந்துமிஎப்
பாலும் அதிரப் பவனிவர - வாலிபத்தாள் 335

அன்னையர் சொன்ன தறுதி யெனவியந்தாள்
கைந்நிறைபொன் னாலத்தி காட்டினாள் - சன்னிதிநின்(று) 336

எண்ணார் புரமெரித்த என்னானைக் காவாரே
வெண்ணாவல் நீங்கா விமலரே - தண்ணறுந்தார் 337

சென்னியுடன் முற்றும் செழுநீர்த் திரளாரே
பொன்னிவரும் ஆரம் பூண்டாரே - என்னிதயத்(து) 338

உம்மை நினைந்தளவே உண்டிகடு வாயினேன்
அம்மதிப்போல் மெய்பாதி ஆயினேன் - வெம்மதன 339

வேளும் பகையாகி விட்டான்விட் டேனாடை
நாளுந்துஞ் சாத நலம்பெற்றேன் - ஆளநீர் 340

என்னைநினைந் தெய்தினால் ஏதோ உமக்கரிதென்(று)
அன்னம் உளப்பா டறிவிப்பப் - பின்னிரக்கம் 341

செய்திலன் வேள்பூசல் தீர்த்திலன் செங்கணருள்
பெய்திலன் ஆதிப் பெருஞ்செல்வன் - மொய்தன் 342

தொடைவழங்கி னானோபொற் றோௗளித்தா னோமின்
கொடைவிரும்பித் தூசுவளை கொண்டான் - கடைவழிபோய்த் 343

திண்தேரும் தானும் தெருவகன்றான் சீராக
வண்டேர் இதழியாள் மற்றொருத்தி - அண்டர் 344


விபரம் செறிமடவார் வேற்றுருவில் தோன்றும்
அபரஞ்சி அன்னாள் அரிவை - தபனன்சீர் 345

பொற்றரளத் தோடாகிப் பொங்குபூ ணாரத்தின்
உற்ற வொளியாய் உடன்மேவ - நற்றுளவோன் 346

ஓதியில் வண்டாய் உறையவொளி ஓதிமமாய்
ஆதி அயனார் அடிதொடரச் - சோதி 347

மயிலாய் வலாரி மகிழநடங் காட்டப்
பயில்வாயுச் சாமரையில் பாயத் - துயிலா 348

அளகா புரேசன் அடிச்சிலம்பாய் நிற்ப
இளகாத மால்தந் திடுவாள் - கிளர்காவில் 349

பத்துமரம் அத்தனையோ பட்டமர மும்கிரியும்
சித்திரமும் ஆவிபெறும் செஞ்சொல்லாள் - அத்திகிரி 350

வெற்பாம் தனியுலையும் மேகத் துருத்திகொடு
கற்பாம் அனிலக் கனலூதப் - பொற்பான 351

எண்டிக்கை முட்டும் இருட்கிரியில் ஈசனார்
கண்டக் கடுஇரும்பு காய்ந்ததனை - அண்டம் 352

பரிக்கும் அராக்குறட்டில் பற்றிவட வெற்போன்
இருக்கும் அடைகல்லில் இட்டு - மருத்துளவோன் 353

ஏனை இடிக்கூடம் எடுத்தெற்றி எமக்கொல்லன்
தானமைத்த வேல்போல் தடங்கண்ணாள் - வானவர்கோன் 354

மேவாரில் அந்த விருத்தா சுரன்மெய்போல்
பூவானம் முட்டப் புடைத்தோங்க - ஓவாது 355

தாரா கணந்தரளத் தாராகிப் பேரண்டம்
வாராகி அற்றைக்கு மற்றைநாட் - கேராது 356

போகப் பொழுதிற் புடைத்துப் பொருமிமிக
மோகத்தை நல்கும் முலையினாள் - மேகத்துக்(கு) 357


அப்பாலும் நீண்ட அதிரேகை மேனிலத்தில்
எப்பா வையரோ டினிதிருந்தே - ஒப்பிலா 358

மாணிக்க அம்மனையேழ் வாங்கிஎறிந் தேற்பளவில்
சேணிற் புயலிலவை சென்றொளிப்பக் - காணாள் 359

திகைத்துமட வீரிதுநாம் தேடுவதெங் கென்றாள்
வகைக்குடக வெற்பின் மழையோ - டுகுப்புண்டு 360

காவிரியில் சேருங்காண் காவையர னார்க்கன்று
நீர்விழுந்த ஆரம்போல் நேருங்காண் - நாவலர் 361

அன்றாற்றில் இட்டபொருள் ஆரூர்க் குளத்துவர
என்றாற் கிதுவும் எளிதென்ன - நன்றென்(று) 362

உவந்து பரவி உடனேசோ திப்பாள்
நவங்கொள் தலம்நின்று நண்ணிச் - சிவன்கோயில் 363

எய்தஅமைந் தாளவ் வெல்லைக்கண் தில்லைக்குள்
செய்த நிருத்தத் திருத்தாளான் - மெய்தனைப்போல் 364

நந்திக் கினியபிரான் நாரணரும் நாகருமுன்
சந்திக்க வாங்கியபொற் சாபத்தான் - வெந்த 365
சுடலைதனி லாடியும்தான் சுத்தனா கைக்கோர்
சடிலமிசைக் கங்கை தரித்தோன் - உடலில் 366

நிறைந்த பணியழகன் நீலக் கிரீபன்
சிறந்த செழுநீர்த் திரளான் - பிறங்கற் 367

குமரிக் கொருபாகன் கோடூர் குழகன்
தமரித்து வேதம் தயங்க - நிமிர்சிகரப் 368

பாரமணித் தேரில் பவனிவரக் கண்டளவே
ஒருநினை வொன்றுசெயல் ஒன்றாகி - ஆரத் 369

தழுவுவாள் போற்செல்லும் தன்தனபா ரத்தைக்
கழுவுவாள் போற்கண்ணீர் காலும் - நழுவும் 370

குருகும் கலையும் குவலயத்தார் கொள்ள
உருகும் தளரும் உயிர்க்கும் - சருகுபடும் 371

நெஞ்சோ டயருமிவள் நேர்கண்டும் காணாஅம்
பஞ்சோ னுடன்சென்றான் ஆதியான் - செஞ்சோதி 372


சித்ர மணிமகுடத் தெய்வத் திருத்தேரில்
அத்திரு வீதியகன் றாங்கொருத்தி - சுத்த 373

தெரிவை புவனத் திலோத்தமை வெள்ளிக்
கிரியின் மருவாத கேகை - கரிவனத்தின் 374

அத்தற்கு நஞ்சை அளித்தபிழைக் கம்போதி
மெத்தப் பயந்துபயன் வேறுதவி - சித்தத்தை 375

அன்புறுத்த வேண்டிஇரண் டாவ தொருபிறையும்
முன்படைத்த தொவ்வாத முண்டகமும் - மின்பரப்பும் 376

வித்துருவும் ஒப்பிலா வெண்முத்தும் மேலான
புத்தமுதும் சஞ்சரிக்கப் புஞ்சகமும் - கைத்தலத்தின் 377

முன்னிரக்கம் செய்யும் முதல்வனா ரைப்போலப்
பின்னிரக்கம் செய்யும் பெருவிடமும் - இன்னிசையைத் 378

தானே முரலுமணிச் சங்கும் கிளைத்தருவும்
வானே பெறாதோங்கும் வாரணமும் - மானத் 379

தனிமையெழில் வல்லி சாதகமும் போத
இனிய அரம்பை இனமும் - புனிதமாம் 380

அல்லலளி ஞெண்டும் வராலும் கமடமும்
நல்லனமும் சேர்த்துமலர் நாரிநிகர் - அல்லவெனப் 381

பெண்ணுருவ மாகிப் பிறங்குமணி பாரித்துக்
கண்ணுதல்முன் விட்டனைய காட்சியாள் - வண்ணமலை 382

ஈசனார் வேண்டி இருந்தவஞ்செய் யாநின்ற
ஊசிஅனைய உரோமத்தாள் - ஆசை 383

பகலுமிரு ளாகாமல் பாதுகாத் தோதி
முகிலின் விதுவை முடிப்பாள் - மகரம் 384

உகளுததி சூழ்ந்த உலோகரையும் லோக
மகளிரையும் மாலாக்க வல்லாள் - சகல 385

வனிதையர் சூழ மதனா லயத்தில்
இனிதுமலர்ப் பீடத் திருந்து - தனதருகு 386

சேவித்து நிற்குஞ் சிலைவேளைப் பார்த்(து)உன்னை
ஏவிப் பணிகொண்டோம் இன்றளவும் - நீவிரும்ப 387

யாஞ்செய்யும் கைம்மா றியம்புவாய் என்பாளைப்
பூஞ்செய்ய தாள்பணிந்து போர்மாரன் - ஈஞ்சைஎமக்(கு) 388

ஈந்தான் இபக்கா இறையவ னைச்செயிக்க
ஆய்ந்தாய்ந்து பார்ப்பேன் அறிகிலேன் - வாய்ந்த 389

படைத்துணையாய் நீவந்தால் பஞ்சசரத் தாலே
விடைத்துணையா னைப்பொருது வெல்வேன் - தொடுத்ததொடை 390

வாகை எனக்காம் வலப்பாகம் அக்கணமே
தோகை உனக்காம் தொடங்கென்ன - ஓகையுடன் 391

ஈதோ அரிதென் றெழுந்தாள்மெய் யில்லானை
நீதேரில் வாவெனப்பின் நேர்கொண்டு - வீதிதனில் 392

சென்றாள் விழிவேல் திருப்புருவ விற்கோலி
நின்றாளல் குற்றேர் நிறுத்தினாள் - குன்றை 393

முறிக்கு முலையானை முன்னணியும் மொய்கார்
நெறிக்குழல்மாப் பின்னணியும் நிற்பக் - குறிக்கைவளைத் 394

தானை மருங்கு தழைப்ப அணிவகுத்தாள்
யானைவனத் தானும் எளியனோ - சேனைக் 395

கணந்தொடர வன்னியார் கைமுயன்று போத
வணங்கு மயில்வடிவர் வாழ்த்த - இணங்குமுடி 396

அம்புருவஞ் சீதரனே யாகச் சிரமேரு
இன்பச் சிலையாய் எதிரேந்த - உம்பர் 397

கரபத் திரம்பொழியக் கல்லார வாகு
வரையிற் பணிவலைய மன்ன - வரியின் 398

முடுகு சினத்துரகன் முன்கை செறிய
அடுதிறற்கை மாமணிநின் றார்ப்பக் - கொடிய 399

துடியதிர நெற்றிக்கண் சோதிதர வேத
வடிவமுறுந் தேரேறி வந்தான் - பிடிநடையாள் 400

கண்டாள் நினைந்த கருமமறந் தாள்காதல்
கொண்டாள் உடல்புளகம் கூட்டினாள் - புண்டரிக 401

அம்பரா ஆதிப் பெருஞ்செல்வா ஆனைக்காச்
சம்புநா தாசந்த்ர சேகரா - பைம்பவள 402

வண்ணா வசந்த அழகா மதனையடு
கண்ணா அடியேனைக் காவென்றாள் - ஒண்ணுதலாள் 403

போற்றுவது கேட்டுப் பொறானாகி எம்மையலர்
தூற்றுவளோ என்றலரைத் தூற்றினான் - கூற்றுதைத்தோன் 404

தன்னை யடைந்தோர்க்குத் தவறுவர வொட்டுமோ
மின்னை யுவந்து விழிவைத்தார் - பின்னை 405

உருவிலியாங் கென்செய்தான் ஒத்தவா றொத்துச்
செருவிலியாய் ஈசன்பின் சென்றான் - வருதெருவில் 406


பொற்புற் றவளொருத்தி பொன்னாட்டின் மின்னார்க்குப்
பிற்பட்டு முற்பட்ட பேரிளம்பெண் - வெற்பின்மதில் 407

காவைச் சிவனாரைப் போலே கரடதட
மாவைப் பணிவிக்கும் வார்த்தையாள் - ஆவிவதை 408

பண்ணுதலால் பேணுதலால் பாகீ ரதிமுடித்த
கண்ணுதலான் இன்னருள்போற் கண்ணினாள் - வண்ணவழ(கு) 409

எல்லாஞ் சுமந்துகனத் தேயோ இனியதன(து)
அல்லாது மாறில்லை ஆகியோ - நில்லாக் 410

கிளரத் திசையிலிடங் கிட்டாத வாறோ
தளர்சிற் றிடைக்கிரங்கித் தானோ - கிளர்சிற் 411

றிடையரிகண் டானை எதிர்ப்பதோ இந்த்ரன்
படையிலடி சாயற் பதமோ - விடையோன் 412

அழுந்துவளை ஆகத் தணையப் பெறாதே
எழுந்துவளர்ந் தென்னபயன் என்றே - செழுங்கடலில் 413

ஆங்கால காலங்கண் டஞ்சியநாள் அண்டரெல்லாம்
வாங்காது கைவிட்ட மந்தரமோ - நீங்கா(து) 414

அடிமுடிவு காணா தரியயன் அஞ்சிப்
படிமிசையின் வீழ்ந்திறைஞ்சும் பண்போ - விடையோனைப் 415

பைஞ்சிலந்தி நூலைப் பறித்தகற்றி யேபணியும்
குஞ்சரமோ என்னவிழுங் கொங்கையாள் - அஞ்சிஉமை 416

காணா தரன்கலந்தால் காயத் திவையழுந்தில்
வீணார வாரமா மேயென்றோ - சேணாடர் 417

வீடார மானதனி வில்லா ளனைத்தழுவக்
கூடாத காதற் கொடுமையோ - நீடறிவான் 418

மாணிக்க முன்னா மணியொன் பதுமகத்தில்
ஏணிப் பசுவுறுப்பென் றெண்ணியோ - காணும் 419

அவையவத்தின் தொல்லை அபிராம மெல்லாம்
இவைகரக்க லாவதென் னென்றோ - கவினிசைத்த 420

நாணாகி யாபரணம் நான்கெய்தி யோநவமாம்
பூணாரம் அத்தனையும் பூணாதாள் - பாணிஉழைக் 421

கன்றேந்தி யைத்தழுவக் கண்டகன் வைப்பிரிந்த
அன்றே விழிக்கெழுதா அஞ்சனத்தாள் - தென்திசையில் 422

ஓடாத காற்றேர் ஒழிந்தால் உருவிலிக்கு
நீடாழித் தேராம் நிதம்பத்தாள் - ஓடாத 423

கங்குற் களிறு கருப்புச் சிலைமலர்க்கோல்
திங்கட் கவிகைகுயிற் சின்னமீன் - தங்குகொடி 424

கட்டாண்மை வேளுக்குக் காலமலாக் காலத்தும்
முட்டா துதவிவினை மூட்டுவாள் - எட்டான 425

தோளானை யாறு பருவத்தி லுந்தொழுது
நீளா தரங்கூரும் நெஞ்சினாள் - கேளார்சொல் 426

கேளா தனவரதம் கேதித் திருப்பாளை
வாளார் தடங்கண் மயிலொருத்தி - வேளாளர் 427

பாணம் உதவுபொழில் பார்க்கவா என்றழைப்ப
வாணுதலும் போதகற்று வான் சென்றாள் - நீணிலத்தில் 428

ஐந்து நிலமும் அமைந்து கிளர்காவின்
வந்துவளர் தேமாவை மாமகிழை - முந்தியகல் 429

லாலை வடத்தை அருச்சுனத்தை ஆத்திதனைப்
பாலையை வேயைப் பலாத் தன்னை - நீலியைப் 430

புன்னையைக் கூவிளையைப் புன்கைப் புனக்கடம்பை
வன்னியைக் கொன்றையை மாதளையைத் - தன்னைச் 431

சினைதரு பாதிரியைத் தில்லையைக் காயாப்
பனையை இலந்தையைப் பராயைப் - புனைகுருந்தை 432

நெல்லியை நோக்கினாள் நித்தருறை நீழலெனச்
சொல்லி யவற்றைத் தொழுதிட்டாள் - எல்லை 433

மாதர் பலரும் மயங்கி மடலேற
மேதகு திண்தேரில் வீதிதொறும் - பூதரமாம் 434

நன்னாவல் கண்டாள்வெண் ணாவ லாய்க்கொண்டு
தன்னாவல் தீரத் தழுவினாள் - என்னாயன் 435

தானன்றோ நீயென்றும் சம்புவே என்றேத்தி
ஆனந்த மாகும் அவசமுறும் - ஏனென்னும் 436

பங்கிற் பசுங்கொடியைப் பாவிக்கும் சேவிக்கும்
செங்கைச் செழுநீர்த் திரள்திரட்டும் - சங்கரனே 437

என்னும் சிவமருள் கொண் டிப்பாவை நிற்பவளை
அன்னம் தொடர்நடையார் ஆவாளைத் - துன்னறிவு 438

போந்ததோ மின்னேநம் பெம்மான்வெண் ணாவலிடம்
சேர்ந்ததோ ஆங்கவரைச் சென்றுதொழ- நேர்ந்ததென்(று) 439

ஆற்றி அணைத்துவரும் அவ்வளவில் அண்டரெலாம்
போற்றி செயசெய போற்றியென - நாற்றிசையும் 440

சேணோர்மண் ணோராய்த் திரண்டுவரக் கல்லாரப்
பூணோன் கயிலைப் பொருப்பினோன் - வாணன் 441

குடமுழவும் நாரதனார் கோதிலா யாழும்
இடமுடைய மூவர் இயலும் - படரும் 442

திருச்செவியில் நாயேன் தெளிவிலாப் புன்சொல்
இருத்தி யருள்கைக் கிசைவோன் - வரத்தில் 443

சிறக்கும் அயனாற் செருக்கியே செத்துப்
பிறக்கும்தெய் வங்கள் பெருமான் - நிறக்குமுரண் 444

சேவினான் கூடற் றிருவீதி யில்விறகுக்
காவினான் றென்னானைக் காவினான் - பூவினான் 445

சம்பு முனிகவுரி தந்தி சிலந்திகனல்
வெம்பு பரிதிமதி விண்ணவர்கோன் - கும்பன் 446

அறிந்தா றறிதுமோ அப்பதிகள் தோறும்
செறிந்தால் எனக்களித்தாள் சித்தம் - புறந்தழைத்த 447

தீர்த்த மகளிர் திருமால் பரவ அருள்
மூர்த்தி அவனி முழுதாள்வோன் - மாத்தேரின் 448

வந்தான்மற் றவ்வளவின் மாதரார் வீதியிற்கண்(டு)
இந்தா தொழுபவனி என்றுரைப்பச் - சந்தாபம் 449

ஆறினாள் பேரழகுக் காருமொவ்வா தீரென்று
கூறினாள் கைதலைமேற் கூப்பினாள் - தேறினாள் 450

பித்தரே ஆதிப் பெருஞ்செல்வ ரேமடவார்க்(கு)
எத்தரே வெண்ணாவல் ஈசரே - நித்தம் 451

புதியவரே ஓராரம் பூண்டபெரு மானே
அதிவிரகம் ஆனேன் அணையீர் - மதனன்என் 452

ஆருயிரைக் காய்ந்தால் அனைத்துலகாள் வாயென்று
பேருமக்குண் டாமோ பெருமானே - நீருருவால் 453

உம்மை வகுத்த முறையால் உமக்குமையாள்
அம்மைகண்டீர் எம்மையிடத் தாளுவீர் - இம்மையில்யான் 454

தானும் அவள்போல் தவத்திகண்டீர் தாழ்ந்தசடை
காணுமிமை யாதகண்ணுங் கண்டீரே - யானுநெடு 455

மாலுடனே வந்தேன் மலைவேளைப் பெற்றேனத்
தாலுமவ ளாகும் நான் தப்பாதே - ஏலுமவட்(கு) 456

ஒற்றைப்பா கந்தான் உதவியது வாங்கரிதேல்
மற்றைப்பா கந்தரினும் வாழேனோ - கொற்றவரே 457

என்று மதியா திசைத்தாள் இறையோனும்
மன்றல் மலர்த்தார் வழங்கினனோ - குன்றளித்த 458

வல்லிக்காய்த் தானஞ்சி மாரனைவாட் டேலென்று
சொல்லிக்காத் தானவ ளுஞ்சோராள் - எல்லையிலா 459

வில்லைக் குனித்தான்வெண் ணாவனிழல் வீற்றிருந்து
தொல்லைச் சிலந்திமுடி சூட்டினோன் - தில்லைச் 460
சிவாவனத்தான் எங்கள் செழுநீர்த் திரளான்
உவாவனத்தான் போந்தான் உலா. 461


மெய்த்திறலோன் வில்லடியும் மீனவன்கை மாறடியும்
புத்தனெறி கல்லும் பொறுத்தநீ - முத்தமிழோர்
செஞ்சொல் தனைவிரும்புஞ் செம்புநா தாஅடியேன்
புன்சொல் தனையும் பொறு.

---

---