திருமுறைகள் பன்னிரண்டும் தோத்திரம், சாத்திரம், பிரபந்தம், புராணம் என நான்கு வகையாக அமைந்துள்ளன. ஒன்று முதல் ஒன்பது வரையான திருமுறைகள் தோத்திர வகையையும், பத்தாவது திருமுறை சாத்திர வகையையும், பதினொன்றாவது திருமுறை பிரபந்த வகநயையும், பன்னிரண்டாவது திருமுறை புராணவகையையும் சாரும். இத்திருமுறைகள் பன்னிரண்டில் பத்தாம் திருமுறையாகத் திகழ்வது திருமந்திரமாலை எனவும், தமிழ் மூவாயிரம் எனவும் வழங்கும் திருமந்திரமாகும். திருமந்திரம் ஒன்பது தந்திரங்களால் அமைந்துள்ளது. ஒன்பது தந்திரங்களும் ஒன்பது ஆகமங்களின் சாரமாகும். தமிழகத்தின் முதல் சாத்திர நூல் திருமந்திரமாகும். முதல் இரண்டு சாத்திர நூல்களான திருவுந்தியாரும், திருக்களிற்றுப்படியாரும் திருமந்திரத்தின் வழி வந்தவையே எனக்கூறலாம். திருமூலர் திருவாவடுதுறையில் தங்கி மூவாயிரம் ஆண்டுகள் தவம் இருந்து ஆண்டுக்கு ஒரு பாடலாகப் பாடியதாகக் கூறுவர்.




     ஐந்து கைகளையும் யானை முகத்தையும் இளம்பிறை போன்ற தந்தத்தை உடையவனும் சிவனது குமாரனும் ஞானச் சிகரமாக விளங்குபவனுமாகிய விநாயகக் கடவுளை அறிவினில் வைத்து அவன் திருவடிகளைத் துதிக்கின்றேன்.



     சிவன் ஒருவனே சத்தியோடு இரண்டாய், பிரம்ம, விஷ்ணு, உருத்திரன் ஆகிய மும்மூர்த்தி களாகி ஆக்கல், காத்தல், அழித்தல் ஆகிய தொழில்களைச் செய்து, நான்கு வேதங்களாகி உண்மை விளங்கச் செய்து, ஐந்து இந்திரியங்களையும் அடக்கும் ஆற்றல் அளிப்பவனாய், ஆறு ஆதாரங்களிலும் விரிந்து, அதற்கு மேல் ஏழாவது இடமாகிய சகஸ்ரதளத்தின் மேல் பொருந்தி, நிலம், நீர், நெருப்பு, காற்று, ஆகாயம், சூரியன், சந்திரன், ஆன்மா ஆகிய எட்டுப் பொருள் களையும் உணர்ந்து அவற்றில் கலந்து அட்டமூர்த்தமாய் விளங்குகின்றான்.



     இறைவனைப் புகழ்ந்து பாடி நான் உரைக்கின்றேன். இனிமையான உயிரிலே பொருந்தியிருக்கும் தூயவனாகவும் நான்கு திசைகளுக்கும் பராசக்திக்கும் தலைவனாகவும், மேல் சொல்லப்பட்ட திசைகளுள் தெற்குத் திக்கிற்குரிய இயமனை உதைத்தவனாகவும் அவ்விறைவனை புகழ்ந்து நான் பாடுகின்றேன்.


     இறைவனை நான் அணுகி இருந்து அநுதினமும் வழிபாடு செய்வேன்.உடனாய் நிற்பவன்; அழிவற்ற தேவர்கள் ஆடையற்றவன் எனப்பரவும் தலைவன். பக்கத்தில் உள்ள திருமால் முதலிய தேவர்கள் அறிய முடியாத மேலோன். இத்தகைய இறை வனை நான் அணுகி நின்று நாள் தோறும் வழிபடுவேன்.


     இறைவனை வணங்கி அறியாமை நீங்கி நின்றேன். அகன்ற சீவர்களுக்கு மெய்ப்பொருள் ஆனவன். வானுலகுக்கு வித்துப் போன்றவன். அடைக்கலமான இடத்திலே என்னைச் செல்ல விட்டவன். இத்தகு இறைவனைப் பகலிலும் இரவிலும் வணங்கிப் பரவி மாறுபாடுடைய இவ்வுலகில் நான் அறியாமை நீங்கி நின்றேன்.



     சிவபெருமானைப் போன்ற தெய்வம் இல்லை! சிவபெருமானோடு ஒப்பாகவுள்ள கடவுள் புறத்தே உலகில் எங்குத் தேடினும் இல்லை. அவனுக்கு உவமையாக இங்கு அகத்தே உடம்பிலும் எவரும் இல்லை. அவன் அண்டத்தைக் கடந்து நின்ற போது பொன் போன்று பிரகாசிப்பான். சிவன் செந்நிறம் பொருந்திய ஊர்த்துவ சகஸ்ரதளத் தாமரையில் விளங்குபவனாவான்.


     சிவனையன்றி முத்தி பெற வழியில்லை! சிவனைக் காட்டிலும் மேம்பட்ட தேவர்கள் ஒருவரும் இல்லை. சிவனல்லாது செய்கின்ற அருமையான தவமும் இல்லை. அவனை அல்லாது பிரமன், விஷ்ணு, உருத்திரன் ஆகிய மூவராலும் பெறுவது ஒன்றும் இல்லை. அவனையல்லாது வீடு பேறு அடைவதற்குரிய வழியை அறியேன்.


     தந்தையாகித் தாங்குவான்! பொன் போன்ற சகஸ்ரதளத்தில் விளங்குபவன் சிவபெருமான். அவனே பழமையாகச் சமமாக வைத்து எண்ணப்படுகின்ற நான்முகன், திருமால், உருத்திரன், முதலிய மூவர்க்கும் பழமையானவன். தனக்கு ஒப்பரும் மிக்காரும் இல்லாத தலைமகன். இறைவனை யாரேனும் "அப்பனே" என்று வாயார அழைத்தால் அப்பனாக இருந்து உதவுவான்.


     இறைவன் வெம்மையன், குளிர்ந்தவன்! தாழ்ந்த சடையை உடைய சிவபெருமான் தீயை விட வெம்மை உடையவன்; (அடியார்க்கு) நீரைவிடக் குளிர்ந்தவன்; குழந்தையை விட நல்லவன்; பக்கத்தே விளங்குபவன்; நல்ல அடியார்க்குத் தாயை விட அருள் செய்பவன். சிவனிடம் அன்பு செய்வார்க்கு தாயைக் காட்டிலும் கருணை புரிவான். இவ்வாறிருந்தும் இறைவனது கருணையை அறிபவர் இல்லை.


     வணங்கக் கூடியவர் எவரும் இல்லாதவன்! இறைவன் பொன்னால் இயற்றப்பட்டாற் போன்ற அழகிய சடை பின்புறம் விளங்க விளங்குபவன். நந்தி என்பது அவனது திருநாமமாகும். உயிர்கட்கெல்லாம் தலைவனாகிய அந்த சிவன் என்னால் வணங்கத் தக்கவன். அப்பெருமானால் வணங்கத் தக்கவர் வேறு எவரும் இல்லை.



     யாவுமாய் நிற்பவன் சிவனே. விசாலமான மலையாகவும் குளிர்ச்சியான கடலாகவும் இப்பூவுலகத்தைத் தாங்கிக் கொண்டும், ஆகாய வடிவினனாகவும், சுடுகின்ற அக்கினியாகவும், அருள் பொழியும் சத்தியுமாகவும் இருக்கிறான். சிவனே எல்லாப் பொருளிலும் வியாபகமாய் உள்ளான்.


     அவன் பெயர் நந்தி. தூரத்திலும் பக்கத்திலும் எமக்கு முன்னோனாகிய இறைவனது பெருமையை எண்ணினால் "ஒத்ததாகச் சொல்லக் கூடிய பெரிய தெய்வம் பிறிதொன்றில்லை." முயற்சியும், முயற்சியின் பயனும், மழையும், மழை பொழிகின்ற மேகமும், அந்த இறைவனே ஆகும். அவன் பெயர் நந்தி.


     அவனே தலைவன் ஒப்பற்ற அன்போடு அழியாதிருக்கும் நெற்றிக் கண்ணையுடைய "சிவனே அழியாதிருக்கும் அருள் புரிபவன்" என்பதை விண்ணவரும் மண்ணவரும் அறியாதிருக்கின்றனரே! என்ன அறியாமை!


     கலந்தும் கடந்தும் இருப்பவன். கண்ணில் கலந்தும் எங்கும் கடந்தும் விளங்குகின்ற சிவனை பிரமன், விஷ்ணு முதலான தேவர்களும் எண்ணத்தில் அகப்படுத்தி நினைப்பதில்லை. மண்ணுலகோரோ சிவனைக் கடந்து சென்று அறிய முடியவில்லை.


     எதனையும் கண்காணிக்கின்றவன். சிவன் சுவாதிட்டான மலரிலுள்ள பிரமனையும், மணிப்பூரகத்திலுள்ள விஷ்ணுவையும், அநாகதச் சக்கரத்திலுள்ள ருத்திரனையும் கடந்து சிரசின் மேல் சகஸ்ரதளத்தில் நின்று எங்கும் கண்காணித்துக் கொண்டுள்ளான்.


     சோதியானவன் சிவன் உலகினைப் படைப்பவனாயும், உடலைக் காத்து மாற்றம் செய்பவனாயும், அழிப்பவனாயும், குவிதல் இல்லாத இயல்போடு ஊழைச் செலுத்துபவனாயும், திருவருள் சோதியாயும், என்றும் அழியாத தன்மையோடு நிறைந்து உள்ளான்.


     தேவர் வணங்குவது ஏன்?அமரர்களும் தேவர்களும் குற்றத்தில் பொருந்தியுள்ளமை யால் அழகு நிறைந்த ஒளியோடு கூடிய நெற்றியையுடைய உமாதேவியை ஒரு பாகத்தில் உடையவனாகிய சிவனது குணத்தைப் பாராட்டி நாடமாட்டார்கள்.


     ஈசன் உறவுக்கு ஒப்பில்லை. தூல உடம்பும் சூக்கும உடம்பும் ஒன்றாகக் கலந்து இருப்பினும் மாயை சம்பந்தமுடைய சூக்கும உடம்பில் தான் கானமானது மிகுந்திருக்கும். அக்கானம் அல்லது நாத வழியே மனம் பதிந்து ஆன்மா தன்னை ஒளி வடிவாகக் காணினும் உடலை விட்டு ஆகாய வடிவினனாகிய சிவனோடு கொள்ளும் தொடர்புக்கு நிகரில்லை.


     தலைவனாக்கும் வள்ளல் ஸ்பந்த உணர்வு சிரசின் வடகீழ்த்திசையில் உள்ளது. வட திசையைப் போற்றி அங்கு விந்துவை ஒளிமயமாகும் யோகம் செய்து உயிர்ச் சத்தியைச் சேமித்து வைத்தால் ஒளி மண்டலம் விளங்கும். இவ்வட திசைக்குத் தலைவனாக நீயும் ஆகலாம் என்று சொல்பவன் எமது தலைவனாவான்.


     சீவரின் தவத்தில் விளங்குபவன். வடதிசைக்குத் தலைவன், விஷய வாசனைக்கு இடமான ஏழு ஆதாரங்களையும் அழித்துப் பால் நிலமாக்கிய மூதறிவாளன், பாவங்களைப் போக்கடிக்கின்ற பலியினைக் கொள்ளும் வடதிசையை இடமாக்கிக் கொண்ட சீவரது உண்மையான தவத்தை நோக்கி அத்தவம் செய்வோரையே இடமாக்கிக் கொண்டு எழுந்தருளியிருக்கிறான்.



     இடியும் முழக்கமும் ஈசர் உருவம். இறப்பையும் பிறப்பையும் கருவில் உதிக்கும் முன்னே வரையறை செய்த சிவன் பொருந்தியுள்ள நியதியை அறியின், அது விளக்கம் மிக்க கண்மலருக்கு மேல் உள்ள சிரசாகும். கண்மலரே அகநோக்கு வழியாகும். ஆகாயபூத அறிவு சிரசில் சிறந்து விளங்கத் தொடங்கும் போது சாதகனது சிரசில் அவ்விறைவனது வடிவம் ஒளியும் ஒலியுமாக விந்து நாதமாக வெளிப்படும்.


     சிவனைப் புகழ்வீர்! சிவன் ஒப்பற்றவன். வானத்தில் உள்ள மேகம் போன்ற கரிய திருமால், பிரமன், தேவர் முதலியவரின் இழிந்த பிறவியை நீக்குபவன். அவன் ஆணவமான காட்டு யானை கதறும்படி பிளந்தவன். இத்தகைய எம் சிவபெருமானைப் போற்றிப் புகழுங்கள். சிவனைப் புகழ்ந்தால் பிறவி நீக்கம் பெற்று உய்யலாம்.


     இறைவன் யாருக்கு உதவுவான்! மாயையில் தோன்றிய உடம்புக்கு உரியவனாகியவனும் தியானப் பொருளாக மனத்தில் தோன்றுகின்றவனுமாகிய சிவன் - சீவர் நினைத்ததை அறிவான் என்ற போதும் சீவர் தாம் சிவனை நினையாதிருக்கின்றனர். கடவுளுக்கு என்னிடத்தில் கருணை இல்லை என்று சொல்லும் தன் கருணைக்கு இலக்காகாமல் தப்பி நிற்பவருக்கும் கருணை வழங்கி நிற்கின்றான் இறைவன்.


     அவனால் வாழ்வு! சர்வ வல்லமையுடைய இறைவனை இல்லை என்று கூற வேண்டாம். அவன் படைத்தல் முதலியவற்றைச் செய்கின்ற கடவுளர்க்கும் தலைவனாய் இரவும் பகலும் ஆன்மாக் களுக்கு அருள் செய்து கொண்டிருக்கின்றான்.


     சிவன் அடிக்கே செல்வம்! போற்றிக் கூறியும், புகழ்ந்து பாடியும், நின்மலனாகிய சிவன் திருவடியை இடைவிடாது தாரகமாகக் கொண்டு தெளியுங்கள். சிவபெருமான் திருவடிக்கே நம் செல்வமெல்லாம் உரியது என்று எண்ணி புறப்பொருளில் மயங்கிக் கிடக்கின்ற மனத்தை மாற்றி நிற்பவரிடத்தில் சிவன் நிலைபெற்று நிற்பான்.



     அஞ்ஞானம் நீங்கும்! சிவன் பிறவி இல்லாதவன். எல்லாவற்றையும் ஒடுக்குபவன். மிக்க அருள் உடையவன். அழிவு இல்லாதவன். எல்லாருக்கும் இடைவிடாத இன்பத்தை அருளுபவன். இத்தகைய சிவனை வணங்குங்கள். அவ்வாறு வணங்கினால் நீங்கள் அவனடி மறவாதவர்களாய் அஞ்ஞானம் நீங்கி ஞானப்பேறு அடையலாம்.


     கமலத்தில் வீற்றிருப்பவன்! சிவன் ஆன்மாக்களை என்றும் தொடர்ந்து நிற்பவன். எங்கும் பரவியுள்ளவன். உலகம் முழுவதையும் கடந்தவன். சகஸ்ரதள ஆயிரம் இதழ்த் தாமரைய மீது இருந்தவன். அத்தகைய சிவனை வணங்குங்கள். அவ்வாறு வணங்கினால் சிவனது திருவடிப்பேறு கிட்டும்.


     உள்ளமே கோயில்! சேர்க்கையின் இடம் என்று சொல்லப்படும் சுவாதிட்டான மலரின் கீழ் ஒளி பொருந்திய முகத்தையுடைய இறுதியில்லாத "இறைவனது கருணை நமக்கே உரியது" என்று அப் பெருமானைத் தினந்தோறும் வழிபடுவோரது புத்தியில் சிவன் தானே புகுந்து பெயராது நின்றான். சுவாதிட்டான மலரில் பிரமனாகத் தொழிற் புரியும் சிவனே சகஸ்ரதளத்தில் சதாசிவ மூர்த்தியாக அருள் புரிகிறான்.


     வழித்துணையாவான்! எக்காலத்தும் எவ்விடத்தும் மாறுபட்ட தன்மையில் நீக்கமற நிறைந்துள்ள சிவன் தனக்கென செயலின்றி உள்ளான். ஆன்மாவோடு பொருந்தியுள்ள சிவன் தன்னை வழிபடு வோர்க்கு வழிகாட்டியாக உள்ளான்.


     அடியாற்கு உறவு யார் உளர்! மாறாத சிவ நினைவு கொண்ட அடியார் மனத்திடை ஆணி வேர் போல் அமர்ந்து இருக்கும் சிவனே, உன்னை காணும்படி நீ நில்லாவிடினும் உன்னை நான் தழுவிக் கொள்ள வெட்கப்பட்டு நிற்கமாட்டேன். உன்னைத் தவிர அடியேனுக்கு உறவு யார் உள்ளார்!


     இறைவனை ஞானம் பெறும்பொருட்டு அழைக்கின்றேன். உலகவர் வேண்டாது தானே பெய்யும் மழை போல இல்லாமல் பால் வேண்டி பசுவை அழைக்கும் கன்றுக்கு பசு பால் கொடுப்பது போல தன்னை அண்டி வேண்டுவோர்க்கு ஞானத்தை சிவன் அருளுவான்.



     உள்ளத்தில் இசையானான்! இறைவன் பூவுலக வாசிகளுக்கு மனித வடிவிலும், புவர் லோக வாசிகளுக்கு ஒளிவடிவிலும், சுவர்லோக வாசி களுக்கு தேவவடிவிலும், சித்திகளை விரும்பியவர்க்கு சித்தராகவும், நிறைவு பெற்ற மனத்தை உடையவர்க்கு நாத மாகவும் காட்சியளிக்கிறான். அத்தகைய சிவனை அகக் கண்ணில் அறிவாக எண்ணி அன்பு பூண்டிருக்க வேண்டும்.


     பாடிப்பரப்புவோம்! விரிந்த நீரால் சூழப்பெற்ற ஏழு உலகங்களையும் கடந்துள் ளவனும், சீவ கோடிகளின் பத்துப் பக்கங்களிலும் நிறைந் துள்ளவனும், மானிடர்கள், தேவர்கள் அனைவர்க்கும் தலைவனுமாகிய சிவனின் அகண்ட வியாபகத் தன்மையை ஒருவரும் முழுதும் அறிந்து இயம்ப முடியாது.


     அமைதியின்றி வாடுகின்றார்! உண்மைப் பொருளான சிவத்தை உணராது பல கடவுளர் களைப் பல கிரியை விதியால் வழிபடுவதாலும், தோத்திரப் பாடல்களைப் பாடுவதாலும் அமைதி கிடைக்காது. அதனால் பயனில்லை.


     எப்போதும் பரவி வழிபடுகின்றேன்! கலவைச் சாந்தில் வீசும் கத்தூரியின் மணம் போல் சிவபெருமான் தேவர்க்கு அருளிய உண்மை நெறி சிவமணம் கமழும். அத்தகைய உண்மையான நெறியில் செல்ல, சிவனின் ஆயிரம் திருநாமங்களை எப்போதும் சொல்லிக் கொண்டிருப்பவர்களின் சீவனில் சிவமணம் எப்போதும் வீசும்.



     ஈசான முகம் விளங்கும்! சிவனைப் போற்ற போற்ற - சிவன் சகஸ்ரதளத்தில் கவிழ்ந்துள்ள அஷ்டதள கமலத்தை நிமிரும்படி செய்து - உங்கள் எண்ணத்தை உலக முகத்தில் இருந்து மேல் முகமாகச் செய்து - உங்களது ஈசானமுகம் ஒளி மயமாக விளங்கச் செய்வான்.


     அருள் பெறலாம் !உயிர்கள் அனைவர்க்கும் தந்தையானவனை, நந்தியை, ஆரா அமுதம் போன்றவனை, வேண்டுவோர்க்கு வேண்டியதை அருளுவதில் தனக்கு ஒப்பில்லாதவனை, அச்சிவனை எந்த முறையில் வழிபட்டாலும் அந்த முறையில் ஈசனின் அருளைப் பெறலாம்.


     இறைவன் கமலத்தில் வீற்றிருக்கும் திறன்! நாள்தோறும் இறைவனை நிலையாய் இருந்து வழிபட்டால், தழல் போன்ற மேனியையுடைய இறைவன் வெளிப்பட்டு நிற்பான். வானத்தில் சந்திரனைப் போல இறைவன் இந்த உடலில் சந்திரமண்டலமாகிய சகஸ்ரதளத்தில் ஜோதி மயமாக இயங்கிக் கொண்டிருக்கிறான்.


     பிதற்றலைக் கைவிடேன்! ஒரு தாயின் வயிற்றில் பிறவாதவன், பெரியவன், அரியவன், உருவமுடையவன் ஆகிய சிவனை சகஸ்ரதளத்தில் நின்று இடைவிடாது தோத்திரம் செய்வதே பெரிய தவம்.



     ஈசன் அருள் பெறலாம்! இறைவன் தன்னைத் திருவைந்தெழுத்தால் வணங்க வல்லவரின் திருவுள்ளத்தில் மிக்க அறிவுப் பேரொளியாய்த் தோன்றுவான். இறைவனை அன்பினால் நேசித்தும், வாயாரப் புகழ்ந்தும், அவனுக்குத் தன்னை முழுமையாகக் கொடுத்தும் வணங்கினால் இறைவன் அருளைப் பெறுவது எளிதாகும்.


     உடலில் புகுந்து நின்றனன் இறைவன்! ஆத்ம தத்துவத்தின் குறையை நினைந்து சிவனது திருவடியை வணங்கி வாழ்த்த வல்லார்க்குச் சிவன் " நீீ வேறு - உடம்பு வேறு " என்று உடலைப் பிரித்தறியும் ஆற்றலை அருளுவான்.



     வணங்குவார் மனத்தகத்தான்! விந்து நீக்கத்தைத் தடுத்து உண்ட தேவர்பிரானாகிய சதாசிவமூர்த்தி நாதமயமாகி நின்று இருட்டை மாற்றி ஒளி மண்டலத்தை விளங்கச் செய்தான். அத்தகைய சிவன் ‘மனம் தூயராய்ப் போற்ற வல்லார்க்கு’ இனமாக வந்து பொருந்துவான்.


     சிவன் இல்லறத்தாரிடமும் வந்து பொருந்துவான்! சிவனை இடைவிடாது தோத்திரம் செய்பவர் மாயையோடு கூடிய உலக சம்சாரப் பந்தத்தில் உழல்பவராயினும் அவ்விறைவன் அவர்களோடு வந்து பொருந்துவான்.


     பூரணமாக நிறைந்து நிற்பான்! சிவனது திருவருளைச் சிந்தித்து அவனது திருவடியைப் புகழ்ந்து பாடி அன்பினால் கசிந்துருகி சிவஞானத்தில் நிலைத்திருப்போர்க்குச் சிவன் அவரது மனத்தைச் செம்மைப்படுத்தி அவரது சீவனில் புகுந்து பூரணமாக நிறைந்திருப்பான்.


     அன்பினுள் விளங்க வைத்தேன்! வானவரும், அசுரரும், மனிதரும் இறைவனை வாழ்க என அன்பின்றி வாழ்த்துவர். நான் அப்பெருமானை வணங்கி அன்பினுள் விளங்குமாறு நிலைபெறும்படி செய்தேன். சிவனது திருவடியை அன்போடு வணங்க வேண்டும்.


     பகலவன் ஆவான்! உலகம் சிவன் விதித்த முறையின்படியே நடக்கின்றது. நமது வாழ்க்கையும் சிவன் விதித்தபடியே தான் நடக்கின்றது. அந்த சிவனை தோத்திரம் செய்து வழிபடுவோர்க்கு சிவன் முத்திநெறி காட்டியருளும் சிவசூரியனாவான்.


     வணங்குபவர் மனம் புகுந்தான்! அந்தி வண்ணன், அரன், சிவம் என உருவமாக வழிபட்டாலும், முந்திவண்ணன்,முதல்வன், பரன் என அருவமாக வழிபட்டாலும், எவ்வண்ணம் வழிபட்டாலும் அவ்வண்ணம் வழிபடுபவர் மனம் புகுந்து அருளுபவன் சிவன்.


     வணங்குபவர் மனம் புகுந்தான்! இல்லறத்திலிருந்து இறைபணி செய்பவர் பெரிய தவத்தை யுடையவர்க்கு ஒப்பாவார். இடைவிடாது தியானத்தில் இருப்பவர் இறைவனது அன்பில் பொருந்தியிருப்பர். உலகவர் விவகார வேளையில் உலகத்திலும் மற்றைய நேரங்களில் சிவசிந்தனையிலும் இருந்தால் இல்வாழ்க்கை யானது அவரைப் பந்திக்காது. இல்லற வாழ்க்கையில் சிவசிந்தனையோடு இருந்தால் பேரின்பம் கிட்டும்.


     அணையா விளக்கைப் பொருந்தியிருந்தேன்! இரவு, பகல் என்ற பேதமின்றி பூமியில் உள்ளோர்க்கு அருளும் மேலான என் தந்தையை அடியார் வணங்கும் தேவதேவனை என்னுடைய சிரசில் தியானித்துப் பொருந்தியிருந்தேன்.


     முத்தியை அடையலாம்! சீவனாகிய பசு ஆணவம், கன்மம், மாயையால் கட்டப்பட்டு துன்புறுவதை உணர்ந்து பதியாகிய சிவனை நினைந்து பொருந்தியிருந்தால் பாவக்கடலைக் கடந்து முத்திக் கரையை அடையலாம்.



     வழிபடுபவர் செய்ய வேண்டியது! பாடியும், மலர்களைத் தூவி அர்ச்சித்தும் இறை சிந்தனை யில் ஆடியும் மனதில் வைத்து அன்பால் போற்றியும் சகஸ்ர தளத்தில் இறைவன் திருவடி கண்டு தியானித்தும் இவனே தேவதேவன் என நாம் அறிந்தபடியெல்லாம் இறைபணி செய்ய வேண்டும்.


     வேதத்தை ஓதி வீடு பெற்றனர்! வேதத்தில் நாம் ஓதத்தக்க நீதிகள் எல்லாம் உள்ளன. எனவே தர்க்கவாதத்தை விட்டு வேதத்தை ஓதி அனுபூதி மான்கள் முக்தி பெற வேண்டும்.


     வேதத்தை உரைத்த காரணம்!வேதத்தின் உட்கருத்தை அறியாது ஓதிக் கொண்டிருப்பவன் உண்மை வேதியராக மாட்டான்.


     நுண்ணிய நிலையினன் சிவபெருமான்!மந்திரவடிவான அழகிய வேதத்தில் ஞானியர்க்குத் தேவை யான உள்ளம் உருக்கும் மந்திரங்களாயும் பிறரை அழிக் கும் கம்பீரமான மந்திரங்களாயும் சூக்கும நிலையில் நின்றவன் முக்கண்ணையுடைய சிவபெருமானாவான். பலனை விரும்பாத ஞானியர்க்கும் பலனை விரும்பும் இல்லறத்தார்க்கும் பலனை அளிப்பவன் சிவன் ஒருவனேயாவான்.


     உபநிடதம் கூறும் நெறி !அறிவு அறியாமையற்ற, வீடுபேறாயுள்ள சிவனைப் பொருந்துமாறு குருவால் உணர்த்தப் பெறும் நெறியே தெய்வீகநெறி.


     சிவனை உணர்வார் இலர்! வேதத்தை அருளிச் செய்த சிவனை நம் உடம்பின் பகுதி யாகக் கொண்டு அவனது இயல்பை உணர வேண்டும். சிவன் வெளியே இருப்பதாக வைத்து பயன் கருதி செய்யும் கருமங்கள் வினையைத்தான் பெருக்கும்.


     புறத்தே போய் அழிவர்! பாட்டும் இசையும் ஆட்டமும் இறைவனது உண்மையை உணர அமைக்கப் பெற்றவை. இந்த உண்மை உணராது ஆடல் மகளிர், அவற்றுக்கான இசையின் புறத்தோற்றத்தில் மயங்குபவர், வேத நெறி காட்டும் உண்மை நெறி நில்லார்: விரதமில்லாதவராவார். அவர் வேள்வியில் விருப்பமுடையவராய் உண்மைப் பொருளை உணராது மாறுபாடுற்று அழிகின்றார்.



     ஆகமங்களை அருளியவன்! உமாபாகன் இருபத்தெட்டு ஆகமங்களை அறுபத்தாறு பேர்களுக்கு உச்சியை நோக்கியுள்ள ஈசான முகத்திலிருந்து உபதேசித்து அருளினான்.

(சதாசிவ மூர்த்திக்கு ஐந்து முகங்கள்:- அவை 1. சத்தியோசாதம் 2. வாமதேவம் 3. அகோரம் 4. தற்புருடம் 5. ஈசானம்).



     ஆகமத்தின் வழி! ஆன்மாக்களின் மீதுள்ள கருணையால் இறைவன் வழங்கிய இருபத்தெட்டு கோடியே நூறாயிரம் ஆகமங்கள் ஈசனது பெருமையை உரைக்கும். யானும் ஆகமத்தின் வழியைப் பின்பற்றி அப்பொருளை வணங்குவேன்.



     சிவபெருமான் வெளிப்படுத்தியவை அறத்தை உரைப்பன! சூக்குமவடிவில் உள்ள கருத்துக்களே ஒலி வடிவில் மொழிகளாக உள்ளன. சிவன் சொல்லிய அறத்தை பதினெட்டு மொழிகளிலும் கருத்து கெடாமல் வெளிப்படுத்த அறிஞர்களால் முடியும்.


     பயனற்றவை. சிவபெருமானால் அருளப்பட்ட கடவுள் தன்மை உடைய எழுபது கோடியே நூறாயிரம் ஆகமங்கள் தேவர்களின் அனுபவத்துக்கு வாராதவை. ஆகமத்தை அறிந்தாலும், அவற்றை அனுபவமின்றி அறிந்தால் பயனில்லை.


     அறிவாய் விளங்குபவன்! உலகத்தைத் தாங்குபவனும், சிவபுண்ணியம் அருளு பவனும், தேவர் வணங்கி வழிபடுபவனுமாகிய சிவபெருமானே பரஞானம், அபரஞானம் அறிவித்து ஆகமத்தில் அறிவாய் விளங்குகின்றான்.


     பரசிவத்திடமிருந்து பெற்றவை! சிவமாகிய பரம்பொருளிடமிருந்து சத்தி, சதாசிவர், மகேசர், உருத்திரர், திருமால், பிரமன் ஆகியோர் அவரவர் அறிவில் பெற்ற ஒன்பது ஆகமங்கள் எங்கள் குருநாதனாகிய நந்தியெம்பெருமான் வழி முறையாகப் பெற்றவை ஆகும்.


     ஒன்பது ஆகமங்களின் பெயர்கள்! குருபரம்பரையில் பெற்ற ஒன்பது ஆகமங்களின் சாரமே திருமூலரின் திருமந்திரமாகும். அவற்றில் 1. காரணம் 2. காமிகம் 3. சிந்தியம் 4. சுப்பிரம் இவை நான்கும் சிவபேதம். 5. வீரம் 6. வாதுளம் 7. காலோத்ரம் 8. மகுடம் இந்த நான்கும் ருத்திர பேதம். 9. யாமளம் தந்திர சாஸ்திரம் என்றும் கூறுவர்.


     நீர் மேல் எழுத்தாகும்! இறைவன் அருளால் வந்த சிவாகமங்கள் கணக்கற்ற கோடி களாகத் தொகுத்துச் சொல்லப் பெற்றிருப்பினும் இறைவன் சொன்ன உண்மைப் பொருளை உணராவிடின் அவை அனைத்தும் நீர் மேல் எழுத்துப் போல் பயனற்றவை.


     ஊழிக்காலத்தில் அருளினான்! சிவபெருமான் பராசக்திக்கு ஆகமப்பொருளை சிருட்டி தொடங்கும் முன் ஊழிக் காலத்தில் வடமொழியிலும் தென்மொழியிலும் உபதேசம் செய்தருளினான்.


     சிவனை ஆகம அறிவால் அறிய இயலாது! ஆன்மாக்களை பந்தத்தில் விடுகின்ற முறைமையினையும், ஆன்மாக்களைப் பந்தத்தில் நின்று நீக்கும் முறைமையினை யும், கண் இமைத்தல் நின்று உயிர் போகின்ற முறைமை யினையும் தமிழ், வடமொழி இரண்டிலும் உணர்த்தப் பெறு கின்ற சிவனையும் ஆகம அறிவினால் அறிய முடியாது.



     நந்தி அருள் பெற்ற எண்மர்! சிவனிடம் உபதேசம் பெற்ற குருநாதர் எண்மராவர். அவர்கள் 1.சனகர் 2.சனந்தனர் 3.சனாதனர் 4.சனற்குமாரர் 5.சிவயோகமாமுனி 6.பதஞ்சலி 7.வியாக்ரபாதர் 8.திருமூலர்.




     நந்தி வழிகாட்ட நான் இருந்தேன்! சிவனருளால் மூலாதாரச் சக்கரத்தில் விளங்கும் உருத்திரனை அடையலாம். சிவன் வழிகாட்ட மூலாதாரத்தி லிருந்து மேலேறிச் சிரசின் மேல் நிலைபெறலாம். சிவனருள் எல்லாவற்றையும் செய்யும். சிவனது அருளால் குருநாதன் என்ற தகுதியையும் பெறலாம்.


     திருமூலரின் மாணவர் எழுவர்! திருமூலர் மூலம் திருமந்திரம் உபதேசம் பெற்ற ஏழுமாணாக்கர்கள். 1.மாலாங்கன் 2.இந்திரன் 3.சோமன் 4.பிரமன் 5.உருத்திரன் 6.காலாங்கி 7.கஞ்சமலையன்.



     நால்வர் உபதேசம் செய்தல்! சனகர், சனந்தனர், சனாதனர், சனற்குமாரர் ஆகிய சனகாதியர் நால்வரும் நான்கு திக்குகளுக்கு ஒருவராய்ச் சென்று தாம் பெற்ற அனுபவங்களைப் பிறர்க்கு உணர்த்தி மேன்மையுடைய குருநாதர்களானார்கள்.


     சிவபெருமான் செய்த உபதேச இயல்பு! இறைவன் சனகாதி நால்வருக்கு உபதேசித்தது துறவு நெறி. சிவயோக மாமுனி, பதஞ்சலி, வியாக்கிரபாதர் மூவருக்கும் உபதேசம் செய்தது உலகுடன் இருந்து உலகுக்கு அருளும் நெறி. இரு நெறிகளிலும் பிறவி நீக்கம் ஒன்றே குறிக்கோளாகும். இரு நெறியையும் இணைப்பதே திருமூலர் நெறியாகும்.



     கடன்களைச் செய்ய உபதேசித்தல்! எட்டுத் திக்குகளிலும் மழை பெய்தாலும் யோகியர் கிரசில் விளங்கும் செவ்வொளியில் அழுந்தியிருத்தல் வேண்டும். செய்கருமங்களை விடாது செய்ய வேண்டும் என்று சிவன் சனகாதியர் நால்வருக்கும் உபதேசித்தருளினான்.




     சிவபெருமானைத் தியானித்து நூலைத் தொடங்குகிறேன். பக்திநெறி - உருவ வழிபாடு. அநாகத சக்ர தியானம் - ஞானநெறி. அருவ வழிபாடு - ஆக்ஞா, சகஸ்ரதள தியானம். சிவபெருமானின் திருவருளால் திருமந்திரமாகிய ஆகமத்தைச் சொல்லத் தொடங்குகிறேன் - திருமூலர்.


     திருக்கூத்தைத் தரிசித்துக் கொண்டிருந்தேன்! சிவயோகம் பயில்பவர் தேகத்தைச் சூழவும் தேகத்து உள்ளும் ஒளிக்கதிர்கள் பாய்ந்து உள்ளும் புறமும் இணைவதை அறிவார். ஏழு ஆதாரங்களையும் ஒளிநெறி பற்றி உள்ளும் புறமும் ஒன்றுபடுத்தி "ஒளி மயமாக இருந்தேன்" என்கிறார் திருமூலர்.


     சிதாகாயத்தில் பொருந்தியிருந்தேன்! அண்டம் என்ற ஆகாயக் கூற்றில் சிவத்தை நோக்கி மேலேறும் போது கீழே சுருண்டு கிடந்த குண்டலினி நிமிர்ந்து மேல் செல்கிறது. மேலே சமாதிக்கு சென்று மீள்பவர் பேரறிவுடன் கூடிப் பின் பிரிந்து மீள்கின்றனர். ஏழு ஆதாரங்களிலும் பொருந்தியிருந்து அந்த ஏழு புவனங்களுக்கும் தலைவியாகிய அருமையான தவத்துக் குரிய சத்தியை சிதாகாயப் பெருவெளியில் பக்தியினாலே தரிசித்தபின் நான் அருளுடன் திரும்பினேன் என்கிறார் திருமூலர்.



     ஆராய்ச்சியால் உண்மையை உணர்ந்தேன்! உணவையும் மறந்து சதாசிவ தத்துவம், முத்தமிழ் வேதம் ஆகியவற்றில் அளவுக்கு மீறிய ஆராய்ச்சியால் மனம் தெளிந்து உண்மைப் பொருளை உணர்ந்திருந்தேன் என்கிறார் திருமூலர்.


     ஐந்தொழிற் கூத்தைக் கூற வந்தேன்! பிரபஞ்ச சிருட்டிக்கு காரணமான ஆற்றல் நீலவொளியில் உள்ளது. நீல ஒளியில் இருந்தே பிரபஞ்சம் படைக்கப் படுகிறது. பிரபஞ்சத்தில் அறிவாகிய செவ்வொளி எல்லா உயிர்களிலும் கலந்துள்ளது. இந்த இரு ஒளிகளால் சூக்கும உலகங்களும் ஸ்தூல பூதங்களும் படைக்கப்பட்டு பஞ்ச கிருத்தியம் நடைபெறுகிறது. இந்த உண்மையை உணர்த்தவே வந்தேன் என்கிறார் திருமூலர்.


     இறைவியின் திருவடியைச் சேர்ந்திருந்தேன்! சிவபெருமான் சீவர்களைப் பக்குவம் செய்யும் பொருட்டு வீணாத்தண்டில் பொருந்தியிருக்கும் சத்தியின் திருவடியைச் சேர்ந்திருந்தேன்; சுழுமுனையில் விளங்கும் சிவசத்தியோடு பொருந்தியிருந்தேன் என்கிறார் திருமூலர்.


     சிவன் திருப் பெயரை எண்ணியிருந்தேன்! சிவனது திருநாமங்களை ஓதி சகஸ்ரதளத்தில் அம்மையப் பனை வழிபட்டு சிவமாகிய அறிவின் நிழலில் சேர்ந்திருந் தேன் என்கிறார் திருமூலர்.


     இராப்பகல் அற்ற இடத்தே இருந்தேன்! தேவர்களும் துதிக்கும்படியான, இரவும் பகலுமற்ற சுயம்பிரகாச வெளியில் நந்தி தேவரின் திருவடியின் கீழ் எண்ணற்ற காலம் அமர்ந்திருந்தேன் என்கிறார் திருமூலர்.


     தமிழ் செய்யுமாறு என்னைப் படைத்தான்! தன்னைப் பற்றித் தமிழில் ஆகமம் செய்யும் வண்ணம் தனக்கு நல்ல ஞானத்தை அளித்ததுடன் இறைவன் தனக்கு பிறவியையும் கொடுத்து அருளினான் என்கிறார் திருமூலர்.



     திருவடியின் கீழ் இருந்தேன்! ஏழு ஆதாரங்கள், விந்து, நாதம் ஆகிய ஒன்பதும் கடந்த நிலையில் சத்தியும் சிவமும் கலந்த சகஸ்ரதளத்தில் நின்று தோத்திரம் செய்து நல்ல அறிவுமயமான சிவனை வணங்கி சிவனது திருவடியின் கீழ் இருந்தேன் என்கிறார் திருமூலர்.


     திருமூலர் வந்த வழி! காமத்தை வெல்கின்ற அறிவு பொருந்திய ஞான முனிவ ரான சிவனை நினைந்து திருக்கைலாயத்திலிருந்து செல்லு கின்ற சூக்குமமாயுள்ள விண் வழியாக இவ்வுலகு வந்தேன் என்கிறார் திருமூலர்.


     வேதச் சொல்லையும் பொருளையும் உணர்த்தல்! சிவபெருமான் வேதத்தின் சொல்லையும் பொருளையும் எனக்கு உணர்த்தி அருளினான் என்கிறார் திருமூலர்.



     சிவம் வந்து உங்களுடன் பொருந்திவிடும்! ஆகாயத்தை இடமாகக் கொண்ட அறிவு சொரூபமான சிவத்தைப் பற்றிச் சொல்லப் போனால் அது உடலைப் பற்றிய உணர்வாகவுள்ள மந்திரமாகும். அந்த மறை பொருளைச் சிந்தித்தால் சிரசில் உணர்வு உண்டாகி விடும். அப்படி இறைவனைப் பற்றி நினைந்து “தான் அடைந்த இன்பத்தை இவ்வுலகமும் அடைவதாக” என்கிறார் திருமூலர்.


     நூலைக் கற்கத் தக்கவர்! பிறப்பிறப்பற்ற சிவனை சுழுமுனையில் கண்டவர் பக்தி யோடு திருமந்திரம் ஓதத் தகுந்தவர் ஆவர்.


     உலகமும் உயிரும் வாழச் செய்வது திருமந்திரம்! இறைவன் உடல் சீராக இருக்கும் வண்ணம் உடலில் அங்கிக் குடரைச் சீராக வைக்கும் "சாடாராக்கினி"யை வைத்தான். ஏழுலகங்களும் சீராக இருக்கும் வண்ணம் "வடவாமுகாக்கினி"யை வைத்தான். எந்த குழப்பமும் இல்லாதிருக்க எல்லாப் பொருள்களையும் அடக்கி வைத்துள்ள திருமந்திரத்தை வைத்தான். உலகையும் உயிரையும் வாழவைக்க உதவுவது திருமந்திரம்.


     திருமாலும் பிரமனும் காண இயலாத வடிவு! 'சிவபெருமானின் திருவடியையும் திருமுடியையும் காண்போம்' என்று நினைத்து, அதற்கு முயன்ற பிரமனும் திருமாலும் ஆகிய இருவரும் இறைவனின் அடிமுடி காணாமல் மீளவும் பூமியில் கூடினர். 'நான் அடி காண்கிலேன்' என்று திருமால் உரைத்தார். 'நான் முடி கண்டேன்' என்று பிரமன் பொய் சொன்னான். திருமாலும் பிரமனும் கூட காண முடியாத சிறப்பினை உடையது இறைவனது வடிவமாகும்.


     என் முடி மீது அடி சூட்டினான்! மேலான பரம்பொருளின் கற்பனையாய் அமைந்த இவ்வுலகில் குருபரன் ஒழிவினை நல்கித் திருவடி தீட்சைச் செய்தருளினான்.


     திருமந்திரத்தில் விளக்கப்பட்டவை! அறியப்படும் பொருளையும், அறிகின்ற அறிவையும், அறிகின்றவனையும், மாயையின் விவரங்களையும் சுத்த மாயையில் விளங்கும் பரை, ஆதி, இச்சை, ஞானம், கிரியை ஆகிய சர்வசத்தியின் கூட்டத்தையும், அவ்வித சத்திகளில் விளங்கும் சிவத்தையும், சொரூபசத்தியின் பிரபாவத்தையும் திருமந்திரத்தில் அறியலாம்.


     அவன் ஆணைப்படி வந்தேன்! அசைவற்றிருக்கும் அறிவு மயமான சோதியான நடராச மூர்த்தியின் ஆணையினால் திருக்கையிலையில் இருந்து தென்னாடு வந்தேன் என்கிறார் திருமூலர்.


     மெய்ஞ்ஞானம் பெற்றேன்! சிவனின் அருளால் மூலாதாரத்தில் உள்ள உருத்திரனையும், பின் சிவனின் அருளால் சகஸ்ரதளத்தில் உள்ள சதாசிவமூர்த்தியையும் தரிசித்து மெய்ஞானம் பெற்று சிவன் அருளில் நிலை பெற்றிருந்தேன் என்கிறார் திருமூலர்.


     திருமூலர் நாதாந்த நிலையில் விளங்கினார்! மூலாதாரத்தில் உள்ள சிவசத்தி சீவனை மேலே செலுத்தியபோது பிரணவத்தின் உச்சியை அடையும். நாத நிலை முடிவு பிரணவத்தின் முடிவாகும். பிரணவமாகிய நாதம் முடிந்த நாதாந்த நிலையில் பிரணவ உச்சியில் ஆன்மா சோதி சொரூபமாக விளங்கும். பிரணவம்: அகாரம், உகாரம் மற்றும் மகாரம் கலந்த ஓம். நாதாந்தநிலை: அகாரம், உகாரம், மகாரம், நாதம், விந்து ஐந்தும் கடந்த நிலை.


     எப்போதும் இறைவனைப் புகழ்வேன்! இரவிலும் பகலிலும் சுயம்பிரகாசமாய், ஒளி வடிவாய் இருக்கும் சிவனை புகழ்ந்து தியானித்து சிவனை அடைய முயல வேண்டும்.



     மூலத்தை அறியேன்! ஏகமாய், சத்தாய், சித்தாய், ஆனந்தமாய் உலக முழுவதும் தோன்றவும் ஒடுங்கவும் நிலைக்களமாகிய கடவுளின் பெரு மையையும் நீளத்தையும் அகலத்தையும் பரப்பினையும் யார் அறிய வல்லவர்? தனக்கென நாமமும் ரூபமும் இல்லாத பெரிய சுடரின் அடியையும் முடியையும் யார் அறிய வல்லவர்?


     நெறியை அறியேன்! பாடும் நெறியில் புகழைப் பாடவோ, பக்தி நெறியில் ஆடவோ, போக நெறியில் நாடவோ, ஞான நெறியில் தத்துவத்தை ஆராயவோ அறியாதவர் உய்வு பெறுவது எங்ஙனம்?


     இறைவனை நாம் உணர முடியாது! நிலைபேறு உடைய வேதத்தை வாக்கினால் ஓதுபவர் சுவரத்தினுள் இனிய நாதரூபமாக எழுகின்ற ஈசனை, அப் பெருமானை நுண்மையிலிருந்து பரு உடலைப் படைத்த பிரமனும், திருமாலும் உணர முடியுமோ? "வேதஸ்வரத் தினில் நாதரூபமாக விளங்கும் இறைவனை நாம் உணர முடியாது"



     பயனை அறியாதவர்! இறைவனை அன்னியப் பொருளாக பாவித்து வழிபடும் முனிவர்களும் தேவர்களும் சிவனை அறியமுடியாது. சிவனை சீவனுக்குள் அகங்காரமின்றிக் காண்பவரே சிவனை அறிய முடியும்.



     திருமந்திரம் மூவாயிரம் பாடல்கள்! மூவாயிரம் திருமந்திரங்களையும் பொருளுணர்ந்து காலை எழுந்தவுடன் ஓதினால் சிவனை அடையலாம்.


     முத்தி நிலை கூறும் மூவாயிரம் பாடல்கள்! திருமந்திரம் மூவாயிரம் பாடல்களைக் கொண்டது. அது ஒன்பது தந்திரங்களாக உள்ளது. முதல் ஐந்து தந்திரம் பொது. பின் நான்கு தந்திரம் சிறப்பு. இந்த பொது, சிறப்பு தந்திரங்களை, மூவாயிரம் பாடல்களை ஓதுவார்க்கு அது இம்மை மறுமைப் பயன் அளிக்க வல்லது.

---

---

---

---