“உங்களின் திருப்திக்காக உணவு உண்ணுங்கள். மற்றவர்கள் திருப்திக்காக ஆடை அணியுங்கள்” என்கிறார் பெஞ்சமின் பிராங்க்ளின்.

     ஆம்... சாதனை மனிதராக உங்களை உருவாக்கிக் கொள்ள விரும்பும் நீங்கள், உங்கள் குறிக்கோளில் முன்னேறி சாதனைச் சிகரத்தை எட்டுவதற்கு, சாதனைப் படிக்கட்டுகளில் அன்றாடம் ஏற வேண்டி இருக்கிறது. அப்போது சாதனைப் படிக்கட்டுகளில் ஆங்காங்கு வீற்றிருக்கும் சாதனையாளர்கள் சிலரை சந்தித்தாகவும் வேண்டியிருக்கிறது. ஆமாம். நீங்கள் சந்திக்கச் செல்லும் மனிதர்கள் சாமான்ய மனிதர்கள் அல்ல. அவர்கள் திறமையில், உழைப்பில் முன்னேறி ஒரு தகுதியில் அமர்ந்துள்ள கனவான்கள். அவர்கள் முன் நீங்கள் உங்கள் முயற்சிக்காகச் செல்லும் போது அவர் மனதில் உங்களைப் பற்றி ஒரு நல்ல அபிப்பிராயம் ஏற்படம் வேண்டுமே எனும் ஆதங்கம் மனதின் அடித்தளத்தில் ஒட்டிக் கொண்டிருக்க நீங்கள் அவரைக் காண அவர் அறைக்குச் செல்கிறீர்கள்.

     அவர் முதல் பார்வை உங்கள் மீது விழுகிறது. அப்போது அவர் கண்ணில் படுவது என்ன? உங்கள் அறிவா? உங்கள் திறமையா? அல்லது இதுவரை உழைத்த உழைப்பா? அல்லது உங்கள் நல்ல குணமா? இல்லை... உங்கள் தோற்றம் தான். அந்தத் தோற்றத்தில் தொண்ணூறு சதவீதம் உங்கள் உடைதான். கசங்காத ‘பளிச்’ உடைகள் உங்கள் மீது அவருக்கு ஒரு நல்ல அபிப்பிராயத்தை ஏற்படுத்தும். உங்கள் முயற்சியும், கோரிக்கையும், அவரால் காது கொடுத்துக் கேட்கப்படும். அடுத்தடுத்து நீங்கள் அந்த அலுவலகத்திற்கு வந்தாலும் அவரது முதல் பார்வையில் பதிந்த உங்கள் தோற்றம் உங்களுக்கு ஒரு வரவேற்பைப் பெற்றுத் தரும். மாறாக கலைந்த தலையுடன், கசங்கிய உடையுடன் நீங்கள் வந்திருந்தால் வாசலில் காவலாளியின் சர்ட்டிபிகேட்டைக் கூட நீங்கள் பெற மாட்டீர்கள். திருப்பி அனுப்பப்படுவீர்கள்.

     “தலையில் கிரீடம் அணிந்த சக்கரவர்த்திக்குக் கிடைக்கும் மரியாதையில் பாதியளவு கூட இரவுத் தொப்பி அணிந்த அதே சக்கரவர்த்திக்குக் கிடையாது” என்கிறார் கோல்ட் ஸ்மித்.

     நிறைய இடங்களில் உங்களுக்கே அந்த அனுபவம் ஏற்பட்டிருக்கலாம்.

     - மடிப்புக் களையாத பளிச் உடையுடன் நிமிர்ந்த நடையுடன் டக்... டக்... என்று நீங்கள் ஒரு அலுவலகத்திற்குள் வரும் போது வாட்ச் மேன் ‘வாங்க ஸார்’, ‘வாங்க மேடம்’ என்று வரவேற்று மேனேஜர் அறை வரை கூட வந்து விட்டு வருவான். அதே நேரம் கசங்கிய உடையுடன், தளர்ந்த நடையுடன் வந்தாலோ ஸ்டூலை விட்டுக் கூட அவனைக் கிளப்புவது கஷ்டம்.

     - மடிப்புக் கலையாத பட்டுப் புடவை சரசரக்க வரும்போது கோவிலில் கர்ப்பக் கிரஹம் வரை உங்களுக்கு ப்ரீ பாஸ்தான்.

     - டிரஸ் வாங்க ஜவுளிக் கடைக்குச் செல்லும் போது கூட நீங்கள் மதிப்பாக டிரஸ் செய்திருந்தால் தான் கடைப்பையனும் மதித்து டிரஸ்களை எடுத்துக் காட்டுவான். இல்லாவிட்டால், ‘இவர் எங்கே வாங்கப் போறாரு?’ என்று மனதிற்குள் உங்களுக்கே ஒரு மதிப்பெண் அளித்துவிட்டு, அடுத்த ‘பளிச்’ உடை கஸ்டமரைப் பார்த்து ‘வாங்க ஸார்’ என்று பளிச் சிரிப்பை உதிர்ப்பான்.

     இப்படிக் கோவில் முதல் கோட்டை வரை உங்களுக்கு மதிப்பெண் போட வைக்கும் உங்கள் உடைக்கு நீங்கள் மதிப்பளிக்காமல் இருக்கலாமா?

     “ஆடைகள் மனிதர்களை உருவாக்கவில்லை. ஆனால் வெகு தூரம் போராடி வெற்றியை எட்ட அவை நல்ல தொடக்கத்தைத் தரும்” என்கிறார் ஒரு மேலை நாட்டு அறிஞர். ஆம் இவரது கூற்று ‘நெப்போலியன் ஹில்’லின் வாழ்க்கையில் நடந்த உண்மைச் சம்பவத்தையே பிரதிபலிப்பதாக இருக்கிறது.

     ‘நெப்போலியன் ஹில்’ எனும் சாதனையாளரது வாழ்க்கையில் திடீரென ஒரு துயரச் சம்பவம் நிகழ்ந்தது. 1918ஆம் ஆண்டு நவம்பர் 11ஆம் நாள் தொடங்கிய உலகப்போர் அவரது தொழிலையும், சொத்துக்களையும் அழிக்க, மிகவும் பின் தங்கிய நிலைக்குத் தள்ளப்பட்டார். மனம் துவளாத அவர் உடனடியாக தனது தையற்காரரை அணுகி சிறந்த ஆடைகளாக 3 செட் தைத்துத் தருமாறு கேட்டார். அவரும் கருஞ் சாம்பல் நிற உடுப்பு, கரு நீல நிற உடுப்பு, ஒரு ஊதா நிற உடுப்பு என்று மூன்று நல்ல செட் துணிகள் தைத்துக் கொடுத்து 375 டாலர் கேட்க, பணம் பிறகு தருவதாக ஹில் சொன்னார். நல்ல வாடிக்கையாளரை இழக்க விரும்பாத தையற்காரர் அதற்கு சம்மதித்தார். பிறகு நல்ல உள்ளாடைகள், டை, சாக்ஸ், பெல்ட் என்று 300 டாலருக்கு வாங்கி அதையும் பிறகு தருவதாகச் சொன்னார். ஆக போரின் காரணத்தால் ஒரே நாளில் 675 டாலர் கடனாளி ஆனார். பிறகு மறுநாள் மிகவும் நேர்த்தியாகப் புத்தாடை அணிந்து சிகாகோ நகரின் மிக்சிகன் தெருவில் மிடுக்காக நடந்து சென்றார். ஆடை கடனில் வாங்கப்பட்டது என்று அவருக்கும் தையல்காரனுக்கும் தவிர வேறு யாருக்கும் தெரியாது. தினமும் அந்தத் தெருவில் நடப்பதை வழக்கமாக வைத்து நடக்கத் தொடங்கினார். ஒரு பணக்கார பிரசுரகர்த்தர் ஒருவரும் பிற்பகல் உணவிற்காக அந்த வழியே செல்வது வழக்கம். தினமும் ‘ஹலோ’ சொல்லிப் பேச ஆரம்பித்த அவர்கள் சில நாட்களில் நெருங்கிய நண்பர்கள் ஆக, ஹில்லின் பத்திரிகை வெளியீட்டிற்குத் தேவையான முதலீடு டாலரை வட்டியில்லாமல் தர முன் வந்தார் அந்தப் பணக்காரர். ஹில் அந்தப் பணத்தைக் கொண்டு பத்திரிகை வெளியிட்டு விரைவில் நல்ல நிலையை அடைந்தார். ஹில் தன்னுடைய வறுமை நேரத்திலும் நேர்த்தியான உடையணிந்து, மிடுக்காக இருந்ததால் அந்தப் பணக்காரரால் வசீகரிக்கப்பட்டார். உதவி தானாகக் கிடைத்தது. மாறாக கசங்கிய துணியுடன் கண்ணில் வறுமை பொங்க, துவண்டு போய் இருந்திருந்தால் அந்தப் பணக்காரர் வலிய வந்து, தேடி வந்து உதவுவாரா என்ன?

     சரி, நேர்த்தியாக உடையணியத் தீர்மானித்து விட்டீர்கள். இதற்கு நீங்கள் செய்ய வேண்டியது என்ன?

     - முதலில் வயதுக்கேற்ற உடையணியுங்கள். வயது முதிர்ந்த ஒரு பெண்மணி லோ கட் ஜாக்கெட், லேஸ் வைத்த ப்ளவுஸ், மிக மெல்லிய புடவை இப்படி இளவயது போல் உடை அணிவது கேலிக்கு இடமளிக்கும். மாறாக, அவர் நல்ல ஆழ்ந்த வண்ணத்தில் காட்டன் புடவை அல்லது பிரிண்டட் பட்டு அணிவது மற்றவர் மத்தியில் ஒரு பெருமையைத் தேடித் தரும்.

     - மற்றவரைக் கவர வேண்டும் என்பதற்காக ஒருபோதும் ஆபாச உடையணியாதீர்கள். லேட்டஸ்ட் மாடல் என்று சொல்லி தொலைக்காட்சி, சினிமா இவற்றில் வருவது போல் லேசாக ஆடைக்குறைப்பு செய்யாதீர்கள். உங்களை வேடிக்கைப் பொருளாக பாவித்து வேடிக்கை பார்ப்பார்களே தவிர மனதார மதிப்பளிக்க மாட்டார்கள். நன்கு உடலை மறைக்கும் ஆடைக்கு என்றுமே மதிப்பு தனிதான்.

     - நீங்கள் அணியும் உடை உங்கள் உருவத்திற்கும் நிறத்திற்கும் பொருத்தமாக இருக்கிறதா என்று பார்த்துக் கொள்ளுங்கள். குள்ளமாக உள்ளவர்கள் குறுக்குக் கோடு போட்ட ஆடைகளையும், உயரமாக உள்ளவர்கள் நீளவாக்கில் கோடு போட்ட ஆடைகளையும் தவிர்க்கலாம். இளநீல நிறம், இளமஞ்சள் வண்ணம், க்ரீம் நிறம் போன்றவை எல்லா நிறத்தவருக்கும் ஏற்றது. நல்ல சிவப்பாக உள்ளவர்களுக்கு அடர்ந்த வண்ணமே அவர்கள் நிறத்தைச் சற்று வெளுப்பாக தூக்கிக் காட்டும். கறுப்பு நிறம் உள்ளவர்கள் அடர்ந்த வண்ணத்தையும், கறுப்பு நிறத்தையும் தவிர்ப்பதே நல்லது. பருமனானவர்கள் பெரிய பூப்போட்ட பெரிய கட்டம் போட்ட உடைகளைத் தவிர்ப்பதே நல்லது.

     - எந்த இடங்களுக்கு எந்த உடை பொருந்தும் என்பதைக் கவனித்து அணியுங்கள். பள்ளி, கல்லூரி, அலுவலகம் செல்பவர்களுக்குக் காட்டன் துணிகளே ஏற்றவை. திருமணம் மற்றும் குடும்ப விசேஷங்களுக்குப் பட்டாடைகளே ஏற்றது. ஒரு கல்யாண வீடு களை கட்டுவதே கலர் கலராய் காஞ்சீபுரம் பட்டு சரசரக்க கலகலவென வளைய வரும் பெண்மணிகளால் தானே! மாலை நேர வரவேற்பு போன்றவைகளுக்கு கலர் சம்க்கி மற்றும் தங்க ஜரிகை வேலைப்பாடு உடைகள் ஏற்றது.

     - உயர் பதவியிலிருக்கும் ஒருவரை சந்திக்கச் செல்லும் போது எக்காரணம் கொண்டும் கசங்கிய ஆடை அணியாதீர்கள். உடையில் கவனமில்லாதவர் எதிலுமே சிரத்தையாக இருக்க மாட்டார் என்று பார்ப்பவரை உங்கள் தோற்றம் நினைக்கச் செய்யும்.

     - சிலர் நன்கு உடைகள் உடுத்தி டிரெஸ் செய்து கொண்டு செல்வர். ஆனால் கையில் கைக்குட்டை வைத்திருப்பதில்லை. கை துடைக்க பேப்பர் நாப்கினைத் தேடிக் கொண்டிருப்பார்கள். இதைத் தவிர்க்க கைக்குட்டை எடுத்துச் செல்ல மறக்காதீர்கள்.

     - பெரும் பொறுப்பான பதவியை வகிக்கும் ஆண்களுக்கு ‘பளிச்’ வெள்ளை நிற உடையே மதிப்பைத் தரும். பெண்களுக்கு இளம் மஞ்சள், இளம் நீல நிற உடை மதிப்பைத் தரும். பொதுவாக வெள்ளை, இள நீல நிற ஆடைகள் அடிக்கடி அணிவது கண்ணியத்தையும், பொறுப்புணர்வையும் அதிகரிக்கும்.

     மேல் நாட்டு அறிஞர் ப்ரீஸ்ட்லி என்பவர் வாழ்க்கையில் நடந்த சிறு சம்பவம்: ப்ரீஸ்ட்லி ஒரு ஆடை அலங்காரப் பிரியர். நேர்த்தியான உடை அணிந்து மற்றவர்களைக் கவர வேண்டும் என்று நினைப்பவர். ஒரு நாள் அலுவலகம் முடிந்து திரும்பிய அவர் ஒரு ஜவுளிக் கடைக்குச் சென்று விலையுயர்ந்த நல்ல டிரெஸ் ஒன்றை எடுத்துத் தருமாறு கேட்டார். கடையில் உள்ள பணியாள் நல்ல உடுப்புகள் அனைத்தையும் எடுத்துக் காட்ட கடைசியில் ப்ரீஸ்ட்லி ‘க்ரிம்ஸன் ரெட் கோட்’ ஒன்றை செலக்ட் செய்து போட்டு அங்குள்ள கண்ணாடியில் பார்த்தார். இந்தக் கோட்டில் நான் எவ்வளவு அழகாக இருக்கிறேன் என்று பார்த்துவிட்டு கழற்ற மனமின்றி கழற்றி அதை வாங்கிக் கொண்டு சென்றார். அடுத்த நாள் அலுவலகத்தில் வேலைப் பளு அதிகம் இருந்த நேரம். அந்தக் ‘கிரிம்ஸன் ரெட் கோட்’ அணிந்து டிப் டாப்பாகச் சென்றார். எல்லோரும் தன்னைக் கவனிக்கிறார்களா, ‘கோட்டை’ப் பற்றி விசாரிக்கிறார்களா, என்று மனதிற்குள் ஒரே ஆராய்ச்சி. கண்டும் காணாமல் இருப்பவர்கள் மேல் ஒரே கோபம். அன்று மாலை வீடு திரும்பினார். ப்ரீஸ்ட்லிக்கு தினமும் மாலை ஒரு அரை மணி நேரம் உட்கார்ந்து தன்னைப் பற்றி அன்று தான் கவனித்த வேலை பற்றி சிந்தித்துப் பார்ப்பது வழக்கம். அன்று சிந்தித்துப் பார்த்த அவர் தன் பகட்டு உடையால் அன்று அலுவலக வேலைகள் அனைத்தும் பாதித்ததை எண்ணிப் பார்த்து தன் செயலுக்காக வருந்தினார்.

     இதிலிருந்து என்ன தெரிகிறது? பொறுப்பான வேலையில் இருப்பவர்கள் வேலைப் பளு அதிகம் உள்ள நேரங்களில் கண்ணியமாக உடையணிவதே போதும். மிகவும் பகட்டான ஆடை அணிவது வேலையைப் பாதிக்கும்.

     என்ன... உங்களைச் செதுக்கிக் கொள்ளும் சிற்பியாகிய நீங்கள் உங்கள் நேர்த்தியான, தனித்துவமான ஆடை மூலம் சிறப்பாக அடையாளம் கண்டு கொள்ளப்படுவீர்கள் தானே!

---

---

---

---